Qostanaıda «Uly dala joryǵy» marafon-báıgesiniń úshinshi kúni ótip jatyr
QOSTANAI. KAZINFORM — Qostanaı oblysynyń Torǵaı dalasynda bastalǵan básekeniń eki kúndik nátıjesinde Jetisý komandasy kósh bastaǵan bolatyn. Búgin dodanyń úshinshi kúni ótip jatyr.
Marafonǵa qazaqstandyq komandalardan bólek, Qyrǵyzstan men Qabardy-Balqar respýblıkasynan qatysýshylar kelgen.
Jarys bastalǵanda eń aldymen Mańǵystaý oblysynyń komandasy sóreden shyqty. Uıymdastyrýshylar buǵan deıin top jaryp, jeńimpaz atanǵandarǵa sondaı múmkindik bergen. Bıylǵy saıys Mirjaqyp Dýlatulynyń 140 jyldyǵyna arnalyp otyr. Torǵaı eldi mekeninde etnoaýyl tigilip, úlken mereke uıymdastyrǵan.
Qostanaı oblysy ákiminiń orynbasary Baqytjan Narymbetov Torǵaı men Arqalyqtyń arasy taýy joq, shóbi shúıgin bolǵandyqtan jarys úshin arnaıy tańdalǵanyn aıtty.
— Oblys ákimdigi jarysty jyl saıyn ótkizýge daıyn. Eger federatsııa usynysymyzǵa qoldaý bildirse, nege ótkizbeske? Ózimiz eki komanda shyǵardyq. Ázirge jaman kele jatqan joq, alǵashqy bestiktemiz, — dedi ol.
Jalpy sany boıynsha 18 komanda básekege túsken. Olar 500 shaqyrymdy eńserýleri tıis.
— Ár qashyqtyqqa shabatyn júıriktiń baǵasy qymbattaı beredi. Men tizgindegen at 5 mln rýbl turady. Biraq soǵan turarlyq. Oǵan zor úmit artyp otyrmyz. Bizge teń keler qarsylas joq. Munyń aldyndaǵy rekordymyzdy jaqsartqymyz keledi, — dedi Qabardy-Balqar respýblıkasynan kelgen qatysýshy.
Báıgeniń alǵashqy kúninde Qyrǵyzstannyń 2 komandasy márege birinshi bolyp jetti. Shabandozdarynyń aıtýlarynsha, negizgi qarsylastary — Qabardy-Balqar men Astana.
Ekinshi kúni Jetisý oblysynyń komandasy 150 shaqyrymdy 7 saǵat 2 mınýt 57 sekýnd ýaqytymen artqa tastap, kósh basyna shyqty. Qyrǵyzstan 1,2, Abaı oblysynyń komandasy úzdik úshtikti túıindedi.
Úshinshi jarys kúni bastalǵanda nusqaýshylar barlyǵyna arnaıy baǵyttar arqyly, joldan jańylmaı júrip otyrýǵa keńes berdi. Qaısysy top jarady — keshkisin kóshpeli kýbokqa ıe bolady. Kún ótken saıyn báıge nátıjesinde ózgeris bolyp jatyr. Máselen, Abaı oblysynan ákelingen attardyń úsheýi ǵana máre syzyǵyn kesti.
Eske salsaq, ótken aıda Atyraýda alaman báıge ótken bolatyn.