Qostanaıda ÚEU jobalaryna 300 mln teńge bólindi
Azamattyq forýmda jergilikti úkimettik emes uıym ókilderi ózara pikir almasyp, qazirgi qoǵamdaǵy ózekti máselelerdi ortaǵa saldy. Forýmǵa Qoǵamdyq damý mınıstrliginiń ókili Qaırat Baımoldınov, Qazaqstan Azamattyq qoǵam Alıansynyń vıtse-prezıdenti Musaǵalı Dýanbekov, «Azamattyq bastamalardy qoldaý ortalyǵy» ulttyq aktsıonerlik qoǵamy basqarma tóraǵasynyń orynbasary Gúlnar Oralova qatysty. Dıalog alańdarynda pikir almasý uıymdastyrylyp, mınıstrlikke, Azamattyq alıansqa ÚEU ókilderi arqyly usynystar jasaldy.
Oblys ákiminiń orynbasary Marat Júndibaevtyń aıtýynsha, Qostanaı oblysy memleket pen azamattyq qoǵamnyń yntymaqtasa jumys isteýi jóninen respýblıkada aldyńǵy qatardan kórinip keledi. Ol jastardy otansúıgishtikke tárbıelep, ultaralyq qatynasta ádep saqtaý qajettigine toqtalyp, dinı ekstremızm men terrorızmge birlese qarsylyq tanytý kerektigin jetkizdi.
«Qazir oblysta 101 úkimettik emes uıym tirkelgen, onyń ishinde 609 uıym belsendi jumys isteıdi. Qazaqstan egemendigin alǵannan kúnnen bastap, halyqtyń ál-aýqatyna basty kóńil bólip keledi. Úkimettik emes uıymdar memlekettik organdar áriptestigi jaqsy damyp keledi. Búginde oblysta ákimıattar qurylymdary men qoǵamdyq, úkimettik emes uıymdardyń áriptestigi 17 baǵytta keńeıip otyr. Osy jyly ÚEU 240 jobany qolǵa almaq. Osy maqsatta 301,4 mln teńge qarjy bólindi. Bul aldyńǵy jyldarmen salystyrǵanda edáýir kóp», -dedi Marat Júndibaev.
Otyrysta aıtylǵan mańyzdy oılar men utymdy usynystar aldaǵy qarasha aıynda Astanada bolatyn respýblıkalyq forýmda talqylanbaq. Forým qatysýshylary úkimettik emes uıymdardyń jumysyn nyǵaıtý, eriktilerdiń bastamalaryn qoldaý týraly dıalog qurdy.
«Memleket azamattyq qoǵamnyń jumysyn qoldaıdy. Osy maqsatta Prezıdent Jarlyǵymen 2016 jyly QR din isteri jáne azamattyq qoǵam mınıstrligi quryldy. Bul - táýelsiz Qazaqstannyń tarıhyndaǵy azamattyq qoǵamdy qoldaý maqsatynda jasalǵan alǵashqy qadam bolatyn. Búginde azamattyq qoǵam ınstıtýtyna degen jurtshylyqtyń senimi joǵary»,-dedi Qoǵamdyq damý mınıstriliginiń ókili Qaırat Baımoldınov.
Marat Júndibaev qostanaılyq belsendi ÚEU-dy QR Qoǵamdyq damý mınıstrliginiń jáne oblys ákiminiń gramotalarymen marapattady. Jeńimpazdarǵa «Jomart júrek» premııasyn jáne «Qazaqstan halqy Assambleıasynyń «Jomart jan» tósbelgisin tapsyrdy.
