Qostanaıda ÝEFA baǵdarlamasy boıynsha qyzdar fýtbolynyń festıvali ótti
ASTANA. QazAqparat - Qostanaıda ÝEFA-nyń qoldaýymen 13 jasqa deıingi qyzdar arasynda fýtbol festıvali ótti, dep habarlaıdy QazAqparat shara uıymdastyrýshysy Qazaqstan fýtbol federatsııasyna silteme jasap.
«Grassroots Festivals for girls - 2017» festıvalin ótkizýge Qostanaı oblystyq dene shynyqtyrý jáne sport basqarmasy, oblystyq fýtbol federatsııalary, «Tobyl» fýtbol klýby atsalysty.
Sharaǵa Qazaqstan fýtbol federatsııasynyń buqaralyq fýtbol, áıelder fýtboly jáne fýtzal departamentiniń dırektory Erlan Jamantaev, oblystyq dene shynyqtyrý jáne sport basqarmasynyń ókili Dmıtrıı Grıaznov, oblystyq fýtbol federatsııasynyń vıtse-prezıdenti Bolat Ysqaqov, «Tobyl» fýtbol klýbynyń qorǵaýshysy Tımýr Jaqypov qatysty.
«Qazaqstannyń barlyq óńirinde festıvalǵa degen qyzyǵýshylyq bar. Biz festıvaldi oıyn túrinde ótkizemiz. Balalardyń fýtbolǵa degen qyzyǵýshylyǵyn arttyryp, kásibı sportqa bet burǵanyn qalaımyz», - deıdi Erlan Jamantaev.
№1 balalar jáne jasóspirimder sport mektebinde ótken sharaǵa júzden asa bala jınaldy. Qazaqstan fýtbol federatsııasy qatysýshylarǵa jańa sporttyq kıimder men fýtbol doptaryn taratty, olar 8 topqa bólindi. Ár toptyń óz nusqaýshysy boldy. Festıval fýtbol elementterinen turatyn oıyn túrinde ótti. Shara sońynda barlyq qatysýshylar dıplomdarmen marapattaldy.
