Qostanaıda TJM qutqarýshylary gazdan ýlanǵan 2 adamdy jertóleden alyp shyqty

QOSTANAI. KAZINFORM – Qostanaı qalasynda gazdan ýlanǵan 2 azamatty TJM qutqarýshylary qutqardy. 

Mınıstrliktiń habarlaýynsha, 2002 jáne 2003 jylǵy eki azamat tereńdigi shamamen 2 metr bolatyn garajdyń jertólesine túsip, ózin nashar sezinip, esinen tanyp qalǵan. Sol kezde 2001 jylǵy úshinshi azamat joǵaryǵa kóterilip, 112 jelisine habarlasyp, qutqarýshylardy kómekke shaqyrǵan. 

– Jedel-qutqarý jasaǵynyń qyzmetkerleri syǵylǵan aýadaǵy apparattardy paıdalana otyryp, jerqoımaǵa túsip, eki er adamdy shyǵaryp, dárigerlerge tapsyrdy. Jedel medıtsınalyq qyzmet qyzmetkerleri zardap shekkenderge oqıǵa ornynda alǵashqy kómek kórsetip, olardy aýrýhanaǵa jetkizdi, - delingen habarlamada. 

Oqıǵa týraly habarlaǵan úshinshi adamdy TJM Apattar medıtsınasy ortalyǵynyń mamandary qarap, aýrýhanaǵa jetkizdi. Tekserýden keıin ol ózin jaqsy sezinip, úıine oraldy.

Aldyn ala málimetter boıynsha, oqıǵaǵa jumys istep turǵan generatordan shyqqan gazdardyń jınalýy sebep bolǵan.

Buǵan deıin Qostanaı oblysynda qutqarýshylar órt kezinde eki adamdy aman alyp shyqqanyn jazǵanbyz.