Qostanaıda tyıym salynǵan temeki túrin satqan dúkender anyqtaldy
QOSTANAI. QazAqparat – Qostanaı qalasynda temekiniń tyıym salynǵan túri – snıýsti satqandar ustaldy, dep habarlaıdy QazAqparat oblystyq qoǵamdyq densaýlyq qorǵaý departamentiniń basshysy Oral Bekmaǵambetovke silteme jasap.
Snıýs – elimizde tyıym salynǵan temeki ónimderiniń bir túri. Biraq, Qostanaı qalasyndaǵy keıbir saýda núkteleri zań buzýshylyqqa jol bergen.
«Júrgizilgen tekserister nátıjesinde Qostanaıda adam densaýlyǵyna zııandy snıýsti satatyn 9 saýda núktesi anyqtalǵan. Snıýs adam ómirine asa qaýipti. Shamadan tys qoldaný ortalyq júıke júıesiniń jumysy, kórý, estý júıesiniń buzylýyna ákeledi. Bir snıýs paketinde 1 nemese 2 gramm nıkotın bolady. Al, tómengi synyp oqýshysy 3 gr nıkotınnen ólip ketýi de múmkin», - deıdi departament basshysy.
