Qostanaıda tutynýshylardyń jylý júıesine tólegen 50 mln teńgesi qaıtaryldy
QOSTANAI.QazAqparat – Qostanaı oblysynda jylý úshin jasalǵan 50 mln teńgeden astam somaǵa qaıta esepteý jasaldy, dep habarlaıdy QazAqparat QR Ulttyq ekonomıka mınıstrliginiń baspasóz qyzmetine silteme jasap.
Kommýnaldyq qyzmet tarıfterin qalyptastyrý qaǵıdalaryna sáıkes, Qostanaı oblysynda jylý energııasyn esepke alý qurylǵylary joq turǵyndardyń tólemderi qaıta esepteldi. Bul tusta tabıǵı monopolııalardyń 23 sýbektisi boıynsha syrtqy aýanyń naqty temperatýrasy eskerildi.
«Tutynýshylardyń quqyqtaryn qorǵaý maqsatynda Tabıǵı monopolııalardy retteý komıtetiniń Qostanaı oblystyq departamenti tarıfterdi qalyptastyrý qaǵıdalarynyń talaptaryna sáıkes, syrtqy aýanyń naqty temperatýrasyna súıene otyryp, jylý energııasynyń qunyn qaıta esepteý jumystaryn aıaqtady. Qostanaı oblysy boıynsha ótken jylytý kezeńinde jylý energııasyn esepke alý qurylǵylary joq 23 nysanǵa jalpy somasy 50718 610 teńgege (QQS-men) tólem qaıta esepteldi. Onyń ishinde tabıǵı monopolııanyń bazalyq sýbektisi «Qostanaı jylytýenergetıkalyq kompanııasy» MKK bar. Kásiporynnyń jylý úshin tólegen 13378280 teńgesi (QQS-men) qaıtaryldy», - delingen mınıstrlik aqparatynda.
Osylaısha, aımaq turǵyndary qaıta esepteýden soń jylýǵa tólegen qarajatyn qaıtaryp aldy.
