Qostanaıda «Túrki álemi» ansamblderiniń festıvali ótip jatyr
Aýqymdy shara Elbasynyń «Rýhanı jańǵyrý», «Uly dalanyń jeti qyry» baǵdarlamalyq maqalasynyń «Túrki áleminiń genezısi» arnaıy jobasyn júzege asyrý aıasynda iske asyp otyr. Oblystyq mádenıet basqarmasynyń basshysy Erlan Qalmaqovtyń aıtýynsha, mundaı festıvalder túrki halyqtarynyń rýhanııatyn jańǵyrtýǵa septigin tıgizedi.
«Halyqaralyq festıvaldiń maqsaty – qoǵamnyń tarıhı sanasyn, qazaqstandyq patrıotızm men ulttyq-rýhanı birlikti damytý, túrki halyqtarynyń rýhanı murasyn jańǵyrtý, túrki áleminiń ózindik ereksheligi men mádenıetin, dástúrlerin nasıhattaý. Bular — Elbasy, Ult kóshbasshysy Nursultan Nazarbaevtyń «Bolashaqqa baǵdar: rýhanı jańǵyrý», «Uly dalanyń jeti qyry» maqalalarynda kórsetilgen basym baǵyttar. Endi búgin is-júzinde kórinis taýyp otyr. Halyqaralyq festıvalge elimizden bólek Ózbekstan, Qyrǵyzstan, Bashqurtstannan qatysýshylar kelip otyrǵany zor mártebe! Osynaý ıgi bastamaǵa qoldaý bildirgen aımaq basshylyǵyna aıtar alǵys sheksiz», – dedi Erlan Qalmaqov.
Orkestrler men ansamblder festıvaline E.Ómirzaqov atyndaǵy Qostanaı oblystyq fılarmonııasynyń qazaq halyq aspaptar orkestri, Qyrǵyzstannyń Bishkek qalasy merııasy halyq aspaptar orkestri, Almaty qalasynan «Hassaq» folklorlyq-etnografııalyq ansambli, Bashqurtstan Respýblıkasy Mejgore qalasynan «DERT» halyq etno-toby, Ózbekstan astanasynan «ISTEЪDOD» ansambli, sondaı-aq, Reseı Federatsııasynyń eńbek sińirgen ártisi, Bashqurtstan Respýblıkasynyń Halyq ártisi, professor Ramıl Gaızýllın kelgen.
Óner festıvaline Tashkenttiń ataqty «ISTEЪDOD» dýtarshylar ansambli qatysty. Jas ónerpazdardan quralǵan ujym halyqaralyq baıqaýlarda birneshe márte top jarǵan.
«Bizdiń top 2000 jyly Ózbekstannyń Kórkemóner akademııasynyń Respýblıkalyq mamandandyrylǵan mektep-ınternaty janynan quryldy. Ansambldiń repertýary óte keń jáne alýan túrli. Ózbek, qazaq, tájik folklorlyq shyǵarmalarymen qatar, álem halyqtarynyń mýzykalaryn da oryndaımyz. Bul festıvalge «Rahat» kompozıtsııasyn alyp keldik. Muny 14-ǵasyrda bizdiń ata-babalarymyz dýdarǵa salyp oınaǵan», - deıdi «ISTEЪDOD» dýtarshylar ansambliniń jetekshisi Nasıba Sadyqova.
Búgin óner ujymdary óz elderiniń dástúrli ánderimen qatar, qazaq halyq mýzykasyn oryndaıdy. Festıval sońynda úzdik ansamblder men oryndaýshylar anyqtalady.
