Qostanaıda turǵyn úı qurylysy eki esege artty

QOSTANAI. QazAqparat - Qostanaı oblysynda turǵyn úı qurylysy byltyrǵy jylmen salystyrǵanda 10%-ǵa artty. Bul týraly oblys ákimdiginde ótken apparat májilisinde oblystyq qurylys, sáýlet jáne qala qurylysy basqarmasynyń basshysy Nurlan Qatarbekov málim etti, dep habarlaıdy QazAqparat tilshisi.

Qostanaı oblysynda bıyl «Nurly jer» baǵdarlamasy boıynsha 290,9 myń sharshy metr turǵyn úı salyndy. Bul 2017 jylmen salystyrǵanda, 10 paıyzǵa kóp. Ásirese, jaldamaly turǵyn úı qurylysy eki esege artyp, kólemi 32,5 myń sharshy metrge jetti.

«2018 jyldyń 9 aıynda 227,6 myń sharshy metr turǵyn úı paıdalanýǵa berildi. Jyl aıaǵyna deıin 63,3 myń sharshy metr úı turǵyndarǵa tapsyrylady. Olardyń ishinde 10 kópqabatty úı bar. Áleýmettik álsiz toptardy jaldamaly páterlermen qamtamasyz etý úshin 1,5 mlrd teńge qarastyryldy. Jalpy, turǵyn úı salýǵa kózdelgen 7,3 mlrd teńge qarajat tolyǵymen qarastyryldy», - dedi Nurlan Qatarbekov.

Negizi qazirge deıin Qostanaı qalasynda 17 kópqabatty úı boı kóterdi. Táýelsizdik kúni merekesi qarsańynda 295 páterli 3 úı el ıgiligine berilmek.

 «2019 jyly «Áýejaı» shaǵyn aýdanynda 32,9 myń sharshy metr aýmaqta baspana salynady. «ıÝbıleınyı» shaǵyn aýdanynda 67 gektar jerde qurylys jumystary bastaldy. Munda 11 úı qoldanysqa beriledi», - dedi basqarma basshysy.

Turǵyn úı qurylysy Qostanaı aýdanynda da qyzý júrip jatyr. Osy maqsatta bıyl 1,5 mlrd teńge jumsaldy. Aýdanda 60 úıdiń irgetasy qalandy.

Nurlan Qatarbekov oblys basshysynan turǵyn úı salýǵa bólinetin qarajatty 10 mlrd teńgege deıin ulǵaıtýdy qarastyrýdy surady. Arhımed Muhambetov bul usynysty qoldaıtynyn aıtyp, turǵyn úılerdiń sapasyna kóńil bólýdi tapsyrdy.

Elbasy bıylǵy Joldaýynda turǵyn úı qurylysyna zor serpin berip otyrǵan «Nurly jer» baǵdarlamasynyń tabysty iske asyrylyp jatqanyn aıtqan bolatyn.

https://kaz.inform.kz/news/elbasynyn-kazakstan-halkyna-zholdauynyn-tolyk-matini_a3411515