Qostanaıda turǵyndarǵa 120% mólsherlememen qaryz berip, 1 mlrd teńge tabys tapqan adam sottaldy
ASTANA. KAZINFORM - Qostanaıda zańsyz mıkrokarjylyq qyzmet jáne qylmystyq jolmen alynǵan kiristerdi zańdastyrý isi boıynsha úkim shyqty.
QMA Qostanaı oblysy boıynsha departamenti jergilikti turǵynnyń zańnamada kózdelgen lıtsenzııasyz múlikti kepilge qoıyp qaryz berý qyzmetin uıymdastyrǵanyn anyqtady. Klıentterdi tartý úshin OLX jáne Instagram platformalarynda jarnamalar ornalastyrylǵan.
Azamattardyń aýyr materıaldyq jaǵdaıyn jáne ekinshi deńgeıli bankterden nesıe ala almaýyn paıdalanǵan ol jyldyq mólsherlemesi 120%-ǵa deıin jetetin joǵary paıyzben qaryz bergen. Sonymen qatar, notarıat kýálandyrǵan sharttarda qaryzdyń naqty somasy emes, aldyn ala eseptelgen syıaqy, resimdeý shyǵyndary jáne ózge de tólemder qosylǵandyqtan, negizsiz ulǵaıtylǵan soma kórsetilgen. Máselen, jábirlenýshilerdiń biri is júzinde 9 mln teńge alǵanymen, shartta 14 mln teńge kórsetilgen. Keıin 18 mln teńge kólemindegi qaryzdy kózdeıtin taǵy bir shart jasalǵan. Alaıda bul shart boıynsha oǵan eshqandaı qarajat berilmegen.
Keıin sot sheshimimen jábirlenýshiden 26 mln teńge óndirilgen. Zańsyz áreketterdiń saldarynan 50-den astam azamat ózderi úshin tıimsiz sharttarmen qaryz mindettemelerine tartylǵan.
Qylmystyq jolmen alynǵan kiris 1 mlrd teńgeden asqan.
Sot úkimimen ol 2 jyl 8 aı merzimge bas bostandyǵynan aıyryldy. Sonymen qatar sot qylmystyq jolmen alynǵan tabysqa satyp alynǵan tórt páterdi, eki jer ýchaskesin, sondaı-aq Mercedes-Benz G500, Dodge RAM 1500 jáne Hyundai Santa Fe avtokólikterin memleket kirisine tárkiledi.
Úkim zańdy kúshine engen joq.
Buǵan deıin Qazaqstanda mıkroqarjy qyzmetterine qoıylatyn biryńǵaı talaptar engiziletinin jazǵan edik.
