Qostanaıda turǵyndardan 211 mıllıon teńge ıemdengen alaıaqtar sottaldy

QOSTANAI. KAZINFORM — Qostanaı oblysynyń eki turǵyny kólikterdi kedendik rásimdeýge jáne qarjylyq máselelerge «kómektesemin» degen jeleýmen tanystarynyń 211 mıllıon teńgeden astam qarjysyn aldap alǵan.

Sot asa iri kólemdegi alaıaqtyq isi boıynsha úkim shyǵardy. Ondaǵan adamdy aldap, iri kólemde qarjy jymqyrǵan eki turǵyn kináli dep tanyldy.

Belgili bolǵandaı, sottalýshylar 2023 jyldyń jeltoqsan aıynan 2024 jyldyń qarasha aıyna deıin top bolyp áreket etip, ózderiniń tanystary men aýyldastaryn birneshe ret aldaǵan. Olar kólikterdi kedennen ótkizý, esepshottardaǵy tyıymdardy joıý jáne basqa da «sheshiletin máseleler» úshin aqsha suraǵan. Jábirlenýshiler nesıe alyp, jınaqtaryn qolhat arqyly alaıaqtarǵa bergen.

Saldarynan 34 adam zardap shegip, jalpy shyǵyn 211 mıllıon teńgeden asty.

Prokýror sottalýshylardy bas bostandyǵynan aıyrý jazasyn jáne 10 jylǵa kásipkerlikpen aınalysýǵa tyıym salýdy surady. Jábirlenýshilerdiń keıbiri jazany qatańdatýdy talap etse, endi biri sheshimdi sottyń erkine qaldyrdy. Barlyq azamattyq talaptar qanaǵattandyryldy.

Sottalýshylar óz kinálaryn moıyndamady.

Sot aıyptalýshylardyń kámeletke tolmaǵan balalary bolýyn jeńildetetin jaǵdaı retinde qarastyrdy. Aýyrlatatyn jaǵdaılar anyqtalǵan joq.

Kúdiktiler kináli dep tanylyp, bir aıyptalýshy 6 jyl 8 aı, ekinshisi 6 jyl 6 aı bas bostandyǵynan aıyrylyp, 10 jylǵa kásipkerlik qyzmetpen aınalysýǵa tyıym salyndy. Olar jazasyn ortasha qaýipsizdik mekemesinde óteıtin bolady. Eshqandaı múlik tárkilengen joq.

Jábirlenýshilerdiń azamattyq talaptary tolyǵymen qanaǵattandyryldy. Úkim áli zańdy kúshine engen joq.

Buǵan deıin Aqmola oblysynyń turǵyny ulynyń jazasyn jeńildetý úshin alaıaqqa 10 mıllıon teńge bergeni týraly jazdyq.