Qostanaıda turatyn 116 jastaǵy ájeı 4 tildi biledi

«Nur Otan» partııasy oblystyq fılıaly tóraǵasynyń birinshi orynbasary Jańabaı Bısembaev pen oblystyq máslıhattyń depýtaty Alma Doşanova 116 jastaǵy Marfýǵa Seltetkenova men 109 jastaǵy Naǵıma Serǵalıevalardyń úılerine baryp, tól merekelerimen quttyqtady.
Marfýǵa Seltetkenova 1902 jyly Reseıdiń Qorǵan oblysynda týǵan. 12 balany ómirge ákelgen. Ekinshi dúnıejúzilik soǵys jyldary kúıeýi maıdan shebine ketken kezde ol ózi suranyp, eńbek armııasyna jazylǵan.

«Anamyz Tobyl ózeniniń boıyndaǵy balyq aýlashylar qatarynda jumys istegen. Soǵystan keıin uzaq jyldar saýynshy boldy, tiginshilikti óte jaqsy meńgergen. Ol qazaq, arab, orys jáne tatar tilderinde sóıleıdi. Sol sııaqty tatar tilinde án aıtýdy jaqsy kóredi. Osy kezge deıin qolynan kitap túspegen, Quran súrelerin tikeleı kitaptan oqıdy, birazyn jatqa aıtady. Onyń anasy men aǵasy ǵasyr asqan kisiler. Anamyz uzaq jasaýdyń qupııasy adamdarmen syılasa bilip, ómirge súıispenshilikpen qaraýda dep aıtyp otyrady», - deıdi qarııanyń qyzy Jibek Qurmanova.

 

Al Naǵıma Serǵalıeva 1908 jyly Meńdiqara aýdanynda dúnıege kelgen. Qostanaıǵa jaqynda kóship kelipti.
«Anamyz ómir boıy qarapaıym saýynshy bolyp jumys istedi. Qoly qalt etkende óleń jazatyn. Aýyldastary ony meıirimdiligi, adamgershiligi men kemeńgerligi úshin syılady. Kezinde aýyldyq, aýdandyq keńesterdiń depýtaty bolyp ta saılandy. Tipti oblys atynan Máskeý qalasyndaǵy Búkilodaqtyq eńbek ozattary jıynyna qatysty», - dep áńgimeleıdi qyzy Záýre Minaıdarova.

 

Naǵıma áje qazir qalamyn qolynan tastamaǵan. Áli tyń. Keıde óleń jazady. Aıtpaqshy, onyń óleńderine qostanaılyq kompozıtor Qajyǵalı Omarov án shyǵardy.



«Nur Otan» partııasy oblystyq fılıaly ǵasyr asqan qarııalarǵa syı-sııapat kórsetti. Jalpy, belgili bolǵandaı, búginde Qostanaı oblysynda jasy 100-den asqan 22 ájeı bar. Olardyń kóbi oblys ortalyǵynan shalǵaı aýyldarda turady.