Qostanaıda tuńǵysh ret tolyqmetrajdy fılm túsiriledi

- Tolyqmetrajdy fılm túsirý ıdeıasy qalaı paıda boldy?

- «Kim kináli?» - taǵdyr taýqymetin tartqandardyń turmysyn kórsetetin týyndy. Drama janrynda túsiriledi. Biz bul fılm arqyly qarııalardyń qıyn jaǵdaıymen bóliskimiz keldi. Odan qaldy, búginde áke men uldyń, ene men kelinniń araqatynasy mańyzdy bolyp tur. Mine, fılm ıdeıasy osydan paıda boldy. Bul oıymdy aıtyp, belgili teatr ártisi Álimhan Myrzahanǵa keldim. Ol kisi meniń ıdeıamdy qoldap, stsenarıı jazýǵa kiristi. Fılm «qańqasy» 3-4 aıda daıyn boldy. Sóıtip, kópten kútken maqsatymyzǵa qol jetkizdik.
 

- Qostanaıda túsirilgen «Saıaq», «Káýsarym» sııaqty qysqametrajdy fılmder jurtshylyqtyń jaqsy baǵasyn aldy. Birneshe ret oblystyq teatrlarda kórsetildi. Mynany aıtyńyzshy, jurt «Kim kináli?» fılminen ne kútedi? Qandaı maqsat qoıdyńyzdar?

- Fılm túsirýdi bastamas buryn, osy suraqtyń jaýabyn izdedik. Joǵaryda aıtqan qarııalardyń janaıqaıyna ún qosý biz kózdegen maqsattardyń biri. Qarııa - qara shańyraqtyń kıesi. Halqymyz yqylym zamannan beri jasy úlkenge qarsy shyǵyp, jolyn kespegen. Ýaqyt ótken saıyn qoǵamnyń tarpań qylyqtaryn kórip jatamyz. Qartaıǵan shaqta qyzyqtaryn kórsetýdiń ornyna qabyrǵalaryn qaıystyryp, taǵdyrdyń aýyr synaǵyna tastap, úıinen áke-sheshelerine oryn taýyp bermeı júrgender joq emes. Ókinishke qaraı, qarııalar úıine kelýshilerdiń qatary azaımaı tur. Oǵan ózimiz de kóz jetkizdik. Osy týyndy arqyly bezbúırek balaǵa oı salsaq, bir keıýana bolsa da, óz otbasyna oralady. Al, bul bizdiń otbasylyq qundylyqtarǵa qosqan shamaly úlesimiz bolar edi.
 

- Túsirilim qashan bastaldy?

- Túsirý tobyn jumysqa kiristirmesten buryn, Rýdnyıdaǵy qarttar úıine baryp, sondaǵy jaǵdaıdy baqyladyq. Zertteý júrgizip, málimet jınaqtadyq. Munan soń qaladaǵy nysandardyń ishinde túsirilim jasaý úshin ákimdikten ruqsat qaǵazyn alýǵa týra keldi. Tehnıkalyq jaraqtar daıyn bolyp, 5 naýryzda túsirýdi bastap kettik. 
 

- Ártister quramyna toqtalsańyz.

- Ústimizdegi jyldyń aqpan aıynda kastıng jarııalandy. Nıet bildirgen 100-den astam adamnyń ishinen otyzy irikteldi. Olar arnaıy synaqtardan ótip, komıssııanyń sheshimimen tańdaldy. Fılmde QR eńbek sińirgen qaıratkeri, belgili akter Qonysbek Begaıdarov rólderdiń birin somdaıdy. «Bir sen úshin» fılminde oınaǵan Álimhan Myrzahan da «Kim kinálige» túsedi. Jalpy, ártisterdiń kóbi Qostanaıdaǵy qazaq jáne orys drama teatrlarynan alyndy. Qalǵan rólder jergilikti turǵyndarǵa tıesili. 

- Fılm qashan jaryqqa shyǵady?

- Bul týyndyny ózimiz qarjylandyrǵandyqtan qıynǵa túsip jatqan nárseler kóp. Degenmen de, montaj jumystarymen qosqanda maýsym aıynyń ortasynda «Kim kináli?» úlken ekranǵa shyǵady.