Qostanaıda tuńǵysh ret qaraqumyq óńdeý tsehy ashyldy

QOSTANAI. QazAqparat - QR Táýelsizdigi kúni oblys ákimi Arhımed Muhambetov qaraqumyq óńdeý tsehynyń ashylý rásimine qatysty, dep habarlaıdy QazAqparat tilshisi.

Bul jobany «Mıbeko» JShS qolǵa aldy. Tseh táýligine qýattylyǵy 55 tonna qaraqumyqty óńdeýge qaýqarly. Qazir qurylys-montajdaý jumystary tolyqtaı aıaqtaldy. Qural-jabdyqtar Gollandııa, Reseı, Túrkııa jáne Qytaıdan ákelingen.

 

 Sondaı-aq, «Mıbeko» kásiporny un jáne jarma ónimderin shyǵarýmen de aınalysady.

 

«Osynaý ulyq meıram kúni biz taǵy da bir nysandy halyq ıgiligine berip otyrmyz. Mundaı tseh oblysta birinshi ret ashylyp otyr. Bul jobaǵa 700 mln teńge jumsaldy. Barlyǵy 32 jumys orny ashyldy», - dedi oblys ákimi.

Arhımed Muhambetov aıtqandaı, atalǵan joba «Sberbank» arqyly júzege asty. Bank usynǵan 15% ústeme somanyń 10%-yn memleket sýbsıdııalaıdy. Sol sebepti «Mıbeko» JShS nesıeni nebári 5%-ben ǵana tóleıdi.

 

«Buǵan qosa «Damý» Qory arqyly 60 aıǵa 180 mln teńge nesıe alyndy. Bul bizdiń jergilikti bıznes úshin jaqsy demeý. Kásiporyn bıyl 5400 tonna un shyǵardy. Ony Ózbekstan men Aýǵanstanǵa eksporttadyq. Menińshe, basqa da Eýropa elderine jetkizýge múmkindik jetkilikti», - deıdi aımaq basshysy.