Qostanaıda tuńǵysh ret 20 qabatty turǵyn úı salynbaq
QOSTANAI. QazAqparat - Qostanaı qalasynda birinshi ret 20 qabatty turǵyn úı jáne zamanaýı qonaq úı salynady, dep habarlaıdy QazAqparat tilshisi.
Qostanaı qalasynyń damýyna arnalǵan keńeste «Bazıs Best» kompanııasynyń atqarýshy dırektory Marat Molmuhamedov bıyl birneshe qurylys jumysynyń bastalatynyn aıtty.
«Osy jyly Tobyl ózeniniń jaǵasynda halyqaralyq standarttarǵa sáıkes keletin tuńǵysh qonaq úı turǵyzylady. Qonaq úı Ramada Encore kompanııalar tobyna tıesili bolmaq. Jańa nysan 163 bólmeni qamtıtyn 6 qabattan turady. Munda zamanaýı meıramhana, saltanat zaly jáne fıtnes bólmesi bolady», - dedi ol.
Sondaı-aq, atalǵan kompanııa qalada tuńǵysh ret 20 qabatty turǵyn úı salýdy josparlap otyr.
«Bastapqyda 16 qabatty úı salamyz dep josparlaǵanbyz. Jaqynda taǵy 4 qabat qosatyn bolyp sheshildi. Munda barlyǵy 100 páter bolady. Jańa turǵyn úı «Bereke» shaǵynaýdanynda boı kóteredi. Qurylys jumystary jaqynda bastalady. Jalpy, «Bazıs Best» kompanııasy óńirge 10-15 mlrd teńge ınvestıtsııa salady», - dedi Marat Molmuhamedov.
Oblys ákimi Arhımed Muhambetov bul ıdeıany qoldaıtynyn jetkizdi. Onyń sózinshe, qaladaǵy bıik úıler 13 qabattan aspaıdy. Sondyqtan, kópqabatty úıler sanyn kóbeıtý kerek. Aldaǵy ýaqytta «Bereke» shaǵynaýdanynda 370 páterli 28 tórtqabatty úı salynady.
