Qostanaıda tumaýǵa qarsy jappaı ekpe egý bastaldy
QOSTANAI. QazAqparat - Qostanaı oblysynda tumaýdyń aldyn alý maqsatynda vaktsına egý sharalary bastaldy, dep habarlaıdy QazAqparat tilshisi.
Búginde Qostanaı oblysyna Reseıde shyǵarylatyn «Grıppol» ekpesiniń 55 myń danasy satyp alynǵan, buǵan memleketten qomaqty qarjy bólindi. Qostanaı oblysy ortalyq aýrýhanasynyń dárigeri L.Savchenkonyń aıtýynsha, vaktsına halyqaralyq standarttan ótkizilgen.
«Bir eskeretini, ekpe egilgennen keıin 14 kúnnen soń kúshine enedi, onyń qorǵanysh belsendiligi 6-dan 12 aıǵa deıin sozylady. Jalpy, qazirgi kúni Qostanaı óńirinde tumaý boıynsha epıdemıologııalyq jaǵdaı turaqty», -dedi dáriger.
Tegin ekpe egý jumystary barlyq azamattarǵa jasalmaıdy. Memlekettik bıýdjet qarajatyna juqpaly aýrýlarǵa shaldyǵý qaýpi eń kóp áleýmettik toptar - sozylmaly ókpe, júrek-qan tamyrlary aýrýlarymen aýyratyn, ımmýnıteti tómen jáne jıi aýyratyn balalar, medıtsına qyzmetkerleri men júkti áıelderge tegin egiledi.
Tumaýǵa qarsy vaktsınany aqyly túrde alýǵa bolady. Máselen, Qostanaı qalasynda «Márııam», «Medservıs plıýs» jeke medortalyqtary men emhanalardyń ekpe bólmelerine júgine alasyz.
Jalpy, 1 jeltoqsanǵa deıin halyq kóp shoǵyrlanǵan eldi mekenderdiń turǵyndaryna ekpe egý josparlanǵan.
