Qostanaıda tumaýǵa qarsy vaktsınanyń baǵasy qansha
QOSTANAI. QazAqparat - Qaýipti juqpaly aýrýlar boıynsha Qostanaı oblysynda epıdemıoloııalyq jaǵdaı turaqty, dep habarlaıdy QazAqparat Qoǵamdyq densaýlyq saqtaý departamentiniń ókili Gúlim Dosymovaǵa silteme jasap.
Qostanaı oblysynda jedel respıratorlyq ınfektsııalarǵa qarsy vaktsına egý jumystary aıaqtalyp qaldy. Búginde óńirde 361 egý pýnkti bar. Alaıda, olardyń barlyǵy tegin ekpe jumystaryn júrgizbeıdi.
«Tegin egý qyzmeti arnaıy áleýmettik toptardyń ókilderine ǵana qarastyrylǵan. Oblys ortalyǵynan shalǵaı ornalasqan turǵyndardyń aqyly emdelýge múmkindigi bola bermeıdi. Sondyqtan olardyń deni Qostanaı qalasyndaǵy «Márııam» jáne «ÝroMed» medıtsınalyq ortalyqtaryna júginedi. Ekpe jumystary qarasha aıynyń ortasyna deıin aıaqtalýy múmkin», - dedi Gúlim Dosymova.
Memlekettik bıýdjet qarjysyna juqpaly aýrýlarǵa shaldyǵý qaýpi eń kóp áleýmettik toptar: sozylmaly ókpe, júrek-qan tamyrlary aýrýlarymen aýyratyn, ımmýnıteti tómen jáne jıi aýyratyn balalar, medıtsına qyzmetkerleri men júkti áıelderge tegin egiledi. Vaktsına jasaıtyn medıtsınalyq mekemelerdiń mekenjaılary turǵylyqty jeri boıynsha aýmaqtyq qoǵamdyq densaýlyq saqtaý departamentteriniń jəne densaýlyq saqtaý basqarmalarynyń saıttarynda ornalastyryldy. Ər óńirdegi aqyly egý kabınetterinde tumaýǵa qarsy vaktsınanyń quny 1 600-3 500 teńge aralyǵynda bolady.
Bir eskeretini, ekpe egilgennen keıin 14 kúnnen soń kúshine enedi, onyń qorǵanysh belsendiligi 6-dan 12 aıǵa deıin sozylady. Aq halattylar tumaýmen aýyrǵan jaǵdaıda ózdiginen em qabyldaýdan saq bolý kerektigin aıtady. «Tumaý aýrýynyń belgileri baıqalǵanda jedel járdem qyzmetiniń kómegine júgingen durys», - deıdi sala mamandary.
Qostanaı oblysy Qoǵamdyq densaýlyq saqtaý departamentiniń málimetinshe, juqpaly aýrýlardyń aldyn alý úshin qolǵa alynǵan vaktsınatsııalaý sharalary bıyl jaqsy nátıje berdi. Sonyń nátıjesinde byltyrǵy kezeńmen salystyrǵanda oblysta ótkir respıratorlyq juqpaly aýrýlarǵa shaldyqqandar qatary 21,1 paıyzǵa tómendegenin habarlaǵan bolatynbyz. Buǵan qosa ózge de juqpaly indet boıynsha kórsetkish edáýir jaqsarǵan.
