Qostanaıda tumaýǵa baılanysty emhanalar demalys pen merekede de jumys isteıdi

QOSTANAI. QazAqparat – Qostanaı oblysynda qalalyq emhanalar 24 jeltoqsan men 15 qańtar aralyǵynda demalys kúnderi jáne mereke kúnderi jumys isteıdi, dep habarlaıdy QazAqparat tilshisi oblystyq densaýlyq saqtaý basqarmasyna silteme jasap.

«Densaýlyq saqtaý basqarmasynyń basshysy Danııar Jandaevtyń buıryǵyna sáıkes 24 jeltoqsan men 15 qańtar aralyǵynda emhanalar demalys jáne mereke kúnderi jumys isteıdi. Buny JRVI jáne JRI kezinde jedel járdem men medıtsınalyq mekemelerdiń qabyldaý bólmesindegi júktemeni jeńildetý maqsatynda jasap otyrmyz. Demalys jáne mereke kúnderindegi jumys ýaqyty 9-dan 14:00-ge deıin. Emhanalardaǵy jalǵyz demalys kúni - 1 qańtar bolady»,-dedi vedomstvonyń baspasóz hatshysy Ksenııa Jylqybaeva.

Joǵaryda kórsetilgen rejımde tek Qostanaı, Lısakovsk, Arqalyq, Jitiqara, Rýdnyı, Tobyl qalalaryndaǵy emhanalar jumys isteıdi.

Basqarmanyń áleýmettik jelilerinde baılanys úshin emhanalardyń baılanys nómirleri jarııalanǵan.