Qostanaıda trıatlonnan Qazaqstan chempıonaty ótedi
ASTANA. QazAqparat - Qostanaıda 18-24 shilde aralyǵynda trıatlonnan Qazaqstan chempıonaty men kýbogy ótedi, dep habarlaıdy QazAqparat tilshisi.
QR Ulttyq olımpıadalyq komıteti taratqan málimetterge súıensek, atalǵan týrnır ulttyq qurama músheleriniń Azııa oıyndary aldyndaǵy basty daıyndyqtardyń biri bolmaq.
Trıatlonnan Qazaqstan birinshiligine Almaty, Aqmola, Qaraǵandy, Qostanaı, Túrkistan oblystary men Almaty jáne Astana qalalarynan 70-ke jýyq sportshy qatysady dep kútilýde.
Qazaqstan trıatlon federatsııasynyń jarystardy uıymdastyrý jónindegi dırektory Sergeı Maıerdiń aıtýynsha, Túrkistan jáne Aqmola oblysynyń sportshylary chempıonattyń basty favorıtteri bolmaq.
«Qazaqstan chempıonaty aıaqtalǵan soń ulttyq qurama sportshylary Almatyda 2-6 tamyz aralyǵynda ótetin Azııa kýbogyna qatysady. Azııa oıyndaryna deıin trıatlonshylar oqý-jattyǵý jıyndaryn ótkizetinin habarlaǵymyz keledi. Seýlde 7-17 tamyz aralyǵynda jattyǵý jıyndary ótedi. Al 18-20 tamyz kúnderi sportshylarymyz Koreıada ótetin Azııa kýbogynda baq synaıdy», - deıdi dırektor.
Sondaı-aq federatsııa ókilderi Djakartadaǵy Azııa oıyndaryna qatysatyn ulttyq qurama sportshylarynyń esimin atady. Jazǵy oıyndarda el namysyn Aıan Beısenbaev (Aqmola oblysy), Maksım Krıat (Astana) jáne Anastasııa Avtýshko (Shymkent) qorǵamaqshy. Ázirge, Azıadaǵa attanatyn tórtinshi sportshynyń esimi belgisiz.
