Qostanaıda traktorlar qurastyrýǵa qatysty jańa joba qarastyrylýda
Quramynda «Allur Group» AQ, «Aıteı Grýpp» holdıngtik kompanııasy jáne «QazAzot» AQ ókilderi bar qostanaılyq delegatsııa qytaılyq áriptesterimen bolashaq ınvestıtsııalyq jobalar boıynsha birqatar kezdesýler ótkizdi.
Qazirgi ýaqytta qytaılyq SMS (China National Machinery Imp. & Exp. Corp.) memlekettik kompanııasynyń «Allur Group» AQ-nyń kapıtal úlesine ıe bolý máselesi qarastyrylyp jatqany belgili. Arhımed Muhambetov atalǵan kompanııa jetekshisimen SMS-diń taıaý arada Allur Group quramyna kirý jospary týraly kelissózder júrgizdi. Іstiń túbegeıli aıaqtalýy bıylǵy qazan aıyna josparlanyp otyr.
«Allur Group» enshiles kompanııasy «Agromashholdıng KZ» AQ-nyń basshylyǵy qytaılyq YTO Group Corporation jetekshilerimen júzdesti. Kompanııa Qostanaı qalasynda TMD naryǵyna baǵyttalǵan jańa traktor zaýytyn salýǵa nıetti.
YTO Group Corporation - negizi 1955 jyly qalanǵan «Sinomach» korporatsııasynyń enshiles kásiporyny. QHR jáne álemdegi mashına qurastyrý, traktorlar óndirisi, aýylsharýashylyǵy men qurylys tehnıkalaryn shyǵaratyn eń iri kompanııanyń biri. Osy jyldyń 6-9 shilde aralyǵynda Beıjiń qalasynda ótken qazaq-qytaı iskerlik keńesi kezinde «Agromashholdıng KZ» AQ Qazaqstanda «YTO» traktorlaryn qurastyrý boıynsha áriptestik memorandýmyna qol qoıǵan bolatyn. Kompanııa ókilderi osy másele jóninde taıaý arada Qazaqstanǵa kelip qaıtpaq.
Qytaılyq tarap Qostanaı oblysynda mashına qurastyrý salasynan basqa jan-jaqty astyq óńdeý jobalary boıynsha da mol qyzyǵýshylyq tanytyp otyr.
Sonyń biri búginde qazaqstandyq «BioGrain» JShS men qytaılyq áriptes-kompanııalar Myande Group Co., Ltd. jáne Beijing Municipal Construction Group Co., Ltd. arasynda birlesken jobalar tóńireginde belsendi jumystar atqarylyp jatyr. Kompanııa basshylary taıaýda Qostanaıdaǵy Indýstrııalyq aımaqta júzege asatyn megajobanyń quny 300 mln dollary ekenin alǵa tartýda.
Kelesi joba Qazaqstanda óndiris kólemi jylyna 500 myń tonna bolatyn DN5 pentametılendıamın (neılon) óndirisin qolǵa alý jáne jylyna 2,3-2,5 mln tonna bıdaı men júgeri óńdeýdi júzege asyrý. Jobanyń bastapqy quny 2-2,5 mlrd dollaryna baǵalanyp otyr. Bul kelissózderge otandyq «QazAzot» AQ men qytaılyq Cathay Industrial Biotech Ltd jáne CITIC Construciton Co. Ltd. kompanııalary uıtqy bolýda. Aıta ketý kerek, CITIC (China International Trust and Investment Corporation), ıaǵnı Múlikti basqarý jónindegi Qytaı halyqaralyq ınvestıtsııalyq korporatsııasy «Aspan asty» elindegi birden bir iri ınvestıtsııalyq korporatsııa bolyp sanalady.
Sondaı-aq Beıjińdegi kezdesý kezinde oblys basshylyǵy aımaqtyń ınvestıtsııalyq múmkindikteri, ekonomıkalyq áleýet jáne memlekettik qoldaýlar jóninde tanystyrylym jasady. Usynylatyn barlyq múmkindikter men ınvestıtsııalyq qolaıly klımatty eskergen qytaılyq tarap aldaǵy jobalardyń sátti júzege asyrylatynyna nıet tanytty.
Oblys ákimi bastaǵan qostanaılyq delegatsııanyń Qytaıdaǵy jumys sapary apta sońyna deıin jalǵasady. Beıjińde SANY GROUP Co. Ltd., SINOTRUK Limited International jáne Hanteng Auto Co. Ltd. kompanııalarynyń basshylyǵymen kezdesýler josparlanǵan. Sondaı-aq qazaqstandyq tarap Anhoı provıntsııasynyń Hefeı qalasynda teledıdar óndirisimen tanymal HKC Corporation Limited kompanııasynyń zaýytyna barady.
Eske salsaq, HKC Corporation Limited kompanııasynyń ókilderi Qostanaı oblysynda teledıdar óndirisin qolǵa alý maqsatymen bıylǵy tamyz aıynyń basynda Indýstrııalyq aımaqty arnaıy kórip qaıtqan bolatyn.
