Qostanaıda toq soqqan qyzdy emdeýge Ulttyq shuǵyl medıtsınany úılestirý ortalyǵynyń mamandary keledi

QOSTANAI. QazAqparat – Qostanaı oblysynyń densaýlyq saqtaý basqarmasynyń ókilderi «kóbik keshinde» toq soqqan Uzynkól aýdany turǵynynyń jaǵdaıy týraly aıtty, dep habarlaıdy QazAqparat.

Qyzdy emdeýge Ulttyq shuǵyl medıtsınany úılestirý ortalyǵynyń mamandaryn tartý jóninde sheshim qabyldandy.

Mekeme jetekshisi Danııar Jandaevtyń aıtýynsha, kishkentaı qyz Uzynkól aýdandyq aýrýhanasyna óte aýyr jaǵdaıda túsken. Bolǵan oqıǵa týraly aýdandyq aýrýhana ókilderi oblystyq balalar aýrýhanasyna habarlaǵan.

«Sanıtarlyq avıatsııamen reanımatologtar kelý kerek degen sheshim qabyldandy. Qyz muqııat tekserýden ótkizilgen soń oblystyq balalar aýrýhanasyna jetkizildi. Ol qazir de sonda em alyp jatyr»,-dedi Jandaev.

Vıdeodan alynǵan kadr: Qostanaı oblysy densaýlyq basqarmasy

«Oblystyq aýrýhanaǵa kelgen soń sanıtarlyq avıatsııa jelisi boıynsha qyzdyń densaýlyǵyna qatysty respýblıka kóleminde mamandardan keńester aldyq. Sońynda Ulttyq shuǵyl medıtsınany úılestirý ortalyǵynyń eki mamanyn tartý jóninde sheshim qabyldandy».

Ol mamandar Qostanaı oblysynyń balalar aýrýhanasyna erteń keledi.

«Bizdiń dárigerler qyzdyń densaýlyǵyn nyǵaıtýǵa bar kúsh-jigerin salyp jatyr»,-dep túıindedi oblystyq densaýlyq saqtaý basqarmasynyń jetekshisi.

Osyǵan deıin Qostanaı oblysynda kóbik keshinde kishkentaı qyzdy tok soqqanyn habarladyq.

Janna Musabaeva