Qostanaıda «Tobyl» fýtbolshysy qatysqan janjal sotqa jetti
ASTANA. KAZINFORM — Qostanaıda «Tobyl» fýtbol klýbynyń qorǵaýshysy Pape Alıýn Ndıaıe qatysqan turmystyq janjaldan keıin ákimshilik is qozǵaldy. Oqıǵanyń mán-jaıyn polıtsııa men fýtbol klýbynyń ókilderi túsindirdi.
Qostanaı oblystyq polıtsııa departamentiniń málimetinshe, janjal kórshiles páterlerdiń turǵyndary arasynda bolǵan.
— Polıtsııa kórshiles páterler turǵyndary arasyndaǵy janjal deregin tirkedi. Oqıǵa saldarynan zardap shekkender joq. Janjaldyń bastalýyna sebepker bolǵan adamǵa qatysty usaq buzaqylyq faktisi boıynsha ákimshilik is qozǵalyp, materıaldar sotqa joldandy, — dep habarlady polıtsııa.
Oqıǵa týraly aqparatty «Tobyl» fýtbol klýby da rastady. Klýbtyń medıa-ofıtseri Qasqyrbaı Qoıshymanovtyń aıtýynsha, janjal turmystyq sıpatta bolǵan jáne fýtbolshy men onyń otbasy múshelerin alańdatqan.
— Qazirgi ýaqytta janjal beıbit jolmen tolyq retteldi. Taraptar ortaq kelisimge kelip, bir-birine eshqandaı talap qoımaıdy. Oqıǵanyń mán-jaıy quqyq qorǵaý organdarynyń nazarynda, — dep habarlady klýb.
Fýtbolshynyń ózi áleýmettik jelidegi paraqshasynda janjalǵa qatysqan ózge adamdardyń sýyq qarýy bolǵanyn jazdy. Sonymen qatar sportshy eshqandaı jaraqat almaǵanyn aıtyp, jaǵdaıdy baqylaýǵa alǵan Qostanaı polıtsııa qyzmetkerlerine alǵys bildirdi.
«Tobyl» FK fýtbolshy men onyń otbasy músheleriniń qaýipsiz jerde ekenin, olardyń ómiri men densaýlyǵyna eshqandaı qaýip tónip turmaǵanyn atap ótti. Klýb oıynshy men onyń jaqyndaryna qoldaý bildirip, jurtshylyqty rastalmaǵan aqparatty taratpaýǵa úndedi.
Eske salaıyq, buǵan deıin Aqtaýda oblystyq balalar aýrýhanasynyń qabyldaý bóliminiń dárigerine shabýyl jasaǵan er adamǵa qatysty qylmystyq is qozǵalǵanyn habarlaǵan edik. Kúdikti ustalyp, ýaqytsha ustaý ızolıatoryna qamaldy.
