Qostanaıda termopark salynyp, basseıni teńiz sýymen toltyrylmaq
QOSTANAI. QazAqparat – Qostanaı qalasyndaǵy Kostanay Plaza saýda, oıyn-saýyq dúkeniniń janynan termopark salynady. Bul týraly oblys ákimi Arhımed Muhambetov qaladaǵy áleýmettik nysandardy aralaý kezinde aıtty, dep habarlaıdy QazAqparat.
Kostanay Plaza saýda, oıyn-saýyq dúkeni eldegi eń iri ortalyqtardyń birine aınalmaq. Arhımed Muhambetovtiń sózinshe, saýda ortalyǵynyń qazirgi aýdany 33 myń sharshy metrdi quraıdy. Endi onyń janynan aýmaǵy 68 myń sharshy metr qosymsha ǵımarat – THERMA PARK boı kóteredi.
«Osylaısha, Kostanay Plaza Qazaqstandaǵy eń iri óńirlik saýda, oıyn-saýyq ortalyqtarynyń biri bolady. Termopark kópfýnktsııaly qyzmet atqarady. Qazirgi tańda termoparktiń qurylys-montajdaý jumystary 80% aıaqtaldy. Sonymen qatar ınjenerlik kommýnıkatsııalar júrgizildi. Ǵımarat ishinde basseınder, monsha kesheni ornalasatyn bolady. Onyń birine taza teńiz sýy quıylady. Bul ǵımaratty salýdaǵy maqsatymyz – salaýatty ómir saltyn nasıhattaý, qala kórkin arttyrý. Bas merdiger nysandy 2020 jyldyń sońyna deıin tapsyrady», - deıdi aımaq basshysy.
Arhımed Muhambetov aıtqandaı, munda jerasty parkıngin de jasaý josparlanyp otyr. Aıta ketý kerek, mundaı tájirıbeler kórshiles Reseıdiń Qorǵan oblysynda bar ári halyq suranysyna barynsha ıe.
