Qostanaıda tergeýshiniń qyraǵylyǵy arqasynda qaraqshy qolǵa tústi
QOSTANAI. QazAqparat. - Qostanaıda jumysqa bara jatqan tergeýshi qylmyskerdi ustady. Bul týraly Qostanaı oblystyq polıtsııa departamentiniń baspasóz qyzmeti málimdedi, dep habarlaıdy QazAqparat tilshisi.
Qylmyskerdi Qostanaı qalalyq polıtsııa basqarmasynyń Ońtústik polıtsııa bóliminiń tergeýshisi Meıram Ajabaev ustaǵan.
«8 qańtar kúni 14:30-da polıtsııa aǵa leıtenanty Meıram Ajabaev úıinde túski asyn iship, Qarbyshev kóshesindegi avtobýs aıaldamasyna bara jatqanda, turǵyn úılerdiń biriniń aýlasynan jan ushyra shyńǵyrǵan áıel daýsyn estip, shuǵyl sol jaqqa burylady. Artynsha, úıdiń kireberisinen qashyp shyqqan er adamdy kórip, artyna túsken», - deıdi polıtseıler.
«Men áıel adamnyń «Eń bolmaǵanda sýretterdi qaldyrshy!» dep aıǵaılaǵan daýsyn estidim. Alǵashynda bul otbasylyq janjal shyǵar dep oıladym. Biraq meniń kele jatqanymdy kórgen er adam qasha jóneldi», - deıdi tergeýshi M. Ajabaev.
Tártip saqshysynan ońaı qashyp qutyla almaıtynyn sezgen sátte qaraqshy qoldy qylǵan zattaryn tastaı zytqan. Biraq, kóp keshikpeı, tártip saqshysy ony qýyp jetti.
Qaraqshy Qostanaıdyń buryn birneshe ret urlyq jasaǵany úshin sottalǵan 33 jastaǵy turǵyny bolyp shyqty.
Avtory: Janna Musabaeva
