Qostanaıda temirjol stantsııasynyń bastyǵy qyzmetinen bosatyldy
ASTANA. KAZINFORM – Qostanaı oblysynda temirjolǵa jaýapty birneshe laýazymdy tulǵa jumystan shyǵaryldy jáne jaýapqa tartyldy. Bul týraly «Qazaqstan temir joly» AQ baspasóz qyzmeti habarlaıdy.
«Kompanııa basshylyǵynyń óńirge jumys sapary kezinde Qostanaı vokzaly men oǵan irgeles aýmaqtyń qanaǵattanarlyqsyz jaı-kúıine baılanysty Qostanaı stantsııasynyń bastyǵy jáne Qostanaı magıstraldyq jeli bólimshesi dırektorynyń vokzal sharýashylyǵy jónindegi orynbasary laýazymynan bosatyldy», - delingen habarlamada.
Odan bólek, Qostanaı júk tasymaldaý bólimshesiniń dırektory, Qostanaı magıstraldyq jeli bólimshesiniń dırektory sharýashylyqty tıisti deńgeıde ustamaǵandary úshin tártiptik jaýapqa tartyldy.
«Atalǵan kemshilikterdi qysqa merzimde joıý mindeti qoıyldy», - deıdi ulttyq kompanııadan.
