Qostanaıda telefon nómirlerin jalǵa berip, alaıaqtarǵa kómektesken jigit ustaldy

ASTANA. KAZINFORM – Qostanaı oblysynda kıberqylmyspen kúres qyzmetkerleri júrgizgen jedel-izdestirý is-sharalary barysynda WhatsApp jáne Telegram messendjerlerinde paıdalanylǵan SIM-kartalardy zańsyz qosý jáne jalǵa berý shemasy áshkerelendi, - dep jazdy Polisia.kz.

Kúdikti birneshe aı boıy uıaly baılanys operatorlarynyń SIM-kartalaryn tirkep, olardy WhatsApp jelisinde qosyp, keıin Telegram arqyly jalǵa berip otyrǵan. Aldyn ala derekter boıynsha, ol birneshe aıdyń ishinde shamamen 35 abonenttik nómirdi jalǵa bergen.

Bul qyzmetten túsken jalpy tabys shamamen 5 mln teńge bolǵan.

Onyń belsendirgen SIM-kartalary arqyly alaıaqtar Qostanaı men Tobyl turǵyndaryn «Sizge sálemdeme keldi» degen shema boıynsha aldap, 2 mln teńgeden astam zalal keltirgen.

Polıtsııa qyzmetkerleri qylmystyq árekette qoldanylǵan qurylǵylar men SIM-kartalardy dáleldeme retinde tárkiledi.

Kúdikti óz kinásin moıyndady. Qazirgi ýaqytta alaıaqtyq faktisi boıynsha sotqa deıingi tergeý júrgizilip jatyr.

Mundaı shemalar — aıtarlyqtaı qaýip tóndiredi ıaǵnı, jalǵa berilgen SIM-kartalar jıi zańsyz maqsattarda, spam taratýdan bastap, anonımdi túrde alaıaqtyq áreketterdi úılestirýge deıin paıdalanylady.

Polıtsııa eskertedi: basqa tulǵalar atyna tirkelgen SIM-kartalardy jalǵa berý jáne paıdalaný — Qazaqstan Respýblıkasynyń zańnamasyn buzý bolyp sanalady. Mundaı jaǵdaılarda jaýapkershilikke jalǵa berýshi de, jalǵa alýshy da tartylady.

 

Eger alaıaqtar sizdiń atyńyzǵa nesıe rásimdese ne isteý kerek, kelesi qadam qandaı bolmaq? Bul týraly Qarjy naryǵyn retteý jáne damytý agenttigi túsindirdi.