Qostanaıda teatr basshysy nemeresiniń toıyn óner uıymynyń qarjysyna ótkizgen
ASTANA. QazAqparat - Qazir Qostanaı oblystyq І.Omarov atyndaǵy qazaq drama teatrynyń burynǵy dırektory Nurlan Erekeshevke, bas býhgalter Gúlzada Bektursynovaǵa jáne kassır-býhgalter Meńsulý Kúltaevaǵa qatysty sot isi jalǵasýda, dep habarlaıdy «Egemen Qazaqstan» gazeti.
Burynǵy dırektor, bas býhgalter jáne kassır-býhgalter uıymdasyp, teatrǵa bólingen 163 mıllıon teńgeni talan-tarajyǵa salǵan. Olar aı saıyn bankten alǵan qarjynyń edáýir bóligin bólisip otyrǵan. Onyń 80 paıyzy dırektorǵa, qalǵan 20 paıyzy bas býhgalter men kassır-býhgalterge tıesili bolǵan.
Sotta málim bolǵandaı, burynǵy dırektor 2005 jyldan 2016 jyly teatrdan ketkenge deıin oǵan teatr qarjysy esebinen kabınetine tústik daıyndalǵan. Úsh bólme úıiniń kommýnaldyq qyzmeti úshin tóleminiń barlyǵy teatr esebinen tólengen. Astanadaǵy nemeresiniń bir jasqa tolý toıyna bir mıllıonnan astam teńge aqsha da teatr esebinen jumsalǵan. Qostanaıdan shaqyrylǵan kisilerdiń poıyzǵa bıleti de teatr esebinen alynǵan.
Teatr basshylyǵy spektaklderge bılet satýdan túsetin qarjyny ótirik ósirip kórsetip kelgen. Teatr tabysynyń jospary «oryndalǵandyqtan» dırektordyń jalaqysyna aıyna 50 paıyzǵa deıin ústeme aqsha qosylǵan. Onyń syrtynda jospardy «oryndaǵan» teatr ujymyna jylyna eki ret syıaqy tólengen. Bul kórsetilgen faktiler teatr basshysy, bas býhgalteri men kassırine taǵylǵan aıyptyń onnan biri ǵana deýge bolady.
