Qostanaıda «Taza Qazaqstan» baǵdarlamasy aıasynda «Taza oıyndar» ótti
QOSTANAI.KAZINFORM — Búgin «Aq shańyraq» demalys aımaǵynda jalpyulttyq «Taza Qazaqstan» baǵdarlamasy aıasynda uıymdastyrylǵan «Taza oıyndar» ekologııalyq aktsııasy ótti.
Іs-sharaǵa «Jasyl El» jastar eńbek jasaǵynyń 100 sarbazy qatysyp, bes komandaǵa bólinip, aýmaqty tazalaý boıynsha ózara saıysqa tústi.
Qatysýshylar demalys aımaǵyna irgeles aýmaqty turmystyq qaldyqtardan tazartyp, jınalǵan qoqysty suryptady. Ekologııalyq saıys qorytyndysy boıynsha eń kóp upaı jınaǵan komanda jeńimpaz atandy. Nátıjelerdi baǵalaý kezinde jınalǵan qaldyqtardyń kólemi men olardy suryptaý sapasy eskerildi. Jeńimpazdar men barlyq qatysýshylar yntalandyrý syılyqtarymen marapattaldy.
Aktsııa qorytyndysy boıynsha qatysýshylar shamamen jarty tonna turmystyq qaldyq jınap, olardy suryptap, ári qaraı qaıta óńdeýge jáne kádege jaratýǵa jiberdi.
Qostanaı oblystyq jastar resýrstyq ortalyǵynyń basshysy Abaı Dúısekovtyń aıtýynsha, mundaı is-sharalar jastardyń ekologııalyq jaýapkershiligin jáne belsendi azamattyq ustanymyn qalyptastyrýǵa yqpal etedi.
- «Taza oıyndar» – qorshaǵan ortaǵa qamqorlyq jasaýdyń qyzyqty, birlikke úndeıtin ári naǵyz komandalyq formatta júzege asatynyn kórsetetin múmkindik. Búgin jastar tek aýmaqty tazalap qana qoımaı, «Taza Qazaqstan» baǵdarlamasyn júzege asyrýǵa ózderiniń jeke úlesin qosty. Tabıǵatqa jáne týǵan ólkege janashyrlyq dál osyndaı bastamalardan bastalady, – dedi Abaı Dúısekov.
«Taza oıyndar» formaty paıdaly ekologııalyq bastamany komandalyq saıyspen ushtastyryp, jastardyń ekologııalyq mádenıetin arttyrýǵa, qorshaǵan ortaǵa jaýapkershilikpen qaraýyn qalyptastyrýǵa jáne qaldyqtardy bólek jınaý mádenıetin nasıhattaýǵa múmkindik berdi.
