Qostanaıda tasqynnan zardap shekkenderge 114 mln teńge birjolǵy tólem berildi

ASTANA. KAZINFORM – Qostanaı oblysynyń negizgi sý qoımalarynda sý aǵyzý baıaýlatyldy. Bul týraly oblys ákiminiń orynbasary Arman Ábenov aıtyp berdi.

Spıkerdiń aıtýynsha, oblys boıynsha sý tasqyny jaǵdaıy turaqtaldy jáne Qaratomar sý qoımasynda sekýndyna 1 600 tekshe metr sý aǵýda.

Joǵary Tobyl jáne Jelqýar qoımalarynda da sý aǵyzýdyń tómendeýi baıqalady. Qarasý aýdanyndaǵy Timtýir, Qundyzdy jáne Qarasý ózenderindegi sý deńgeıiniń tómendeýi táýligine 7-den 81 sm-ge deıin qurady.

«Oblystyń ońtústik bóligindegi Torǵaı, Dámdi jáne Qabyrǵa ózenderinde sýdyń áli de joǵary deńgeıi saqtalýda. 161 jer úı sý astynda qalyp otyr. Sý basýyna baılanysty 27 eldi meken áli kúnge deıin elektrmen jabdyqtaýsyz qalyp otyr. Búgingi kúnde elektr baǵandary sýda qalǵan, bul olardy qalpyna keltirý jumystaryn qıyndatýda, sý ketkennen keıin jumys jalǵasady», - dedi A. Ábenov Ortalyq kommýnıkatsııalar qyzmetinde ótken baspasóz máslıhatynda.

Aımaqta respýblıkalyq mańyzy bar 4 jáne oblystyq mańyzy bar 3 avtojol jabyldy. On eldi mekenmen kólik qatynasy úzilgen.

«Halyq azyq-túlikpen jáne dári-dármekpen tolyq qamtamasyz etilgen. Sý tasqynynan zardap shekkenderdiń barlyǵyna kómek kórsetý jalǵasýda. Birjolǵy áleýmettik tólemder bastaldy, sondaı-aq demeýshilik jáne gýmanıtarlyq kómek kórsetilýde. Búgingi tańda áleýmettik kómek 620 otbasyna 114,4 mln teńge somasynda tólendi», - dedi ákim orynbasary.