Qostanaıda tasqyn shyǵynyn óteýge tótenshe rezervten 2,4 mlrd teńge bólindi
ASTANA. KAZINFORM – Oblystyq tótenshe jaǵdaı rezervinen bólingen qarajat tótenshe jaǵdaı jarııalanǵan aımaqtardaǵy sý tasqynyn joıýǵa jumsaldy. Bólingen soma 2,4 mlrd teńgeni qurady.
Onyń ishinde halyqqa keltirilgen shyǵyndy óteý jáne birjolǵy áleýmettik kómek tóleý, sondaı-aq sý tasqynynan zardap shekken eldi mekenderdi jol ınfraqurylymy men elektrmen jabdyqtaýdy qalpyna keltirý sharalary qamtyldy. Atap aıtqanda, somanyń basym bóligi Arqalyq qalasyna – 880 mln teńge, Qostanaı aýdanyna – 419 mln teńge aýdaryldy. Amangeldi jáne Jangeldi aýdandaryna 351 jáne 316 mln, oblys ortalyǵyna 300 mıllıon teńge jiberildi.
«QR Úkimetiniń tótenshe rezervinen Arqalyq qalasynda páter satyp alýǵa 405 mıllıon teńge birinshi transh bólindi, 27 páter satyp alyndy», - dep habarlady oblystyq ákimdiktiń baspasóz qyzmeti.
Malǵa keltirilgen shyǵyndy tóleýge kelsek, 780 bastyń tólemi óteldi. Sý tasqynynan barlyǵy 980 bastan astam mal qyryldy.
Sondaı-aq 1736 ótinish boıynsha 640,9 mln.teńgege áleýmettik kómek tólendi. Aıta keterligi, Amangeldi aýdanynda barlyǵy 317 ótinish qaralsa, qalǵan aýdandarda áli de jumys jalǵasýda. Ótinishter áli de qabyldanyp jatyr. Qazirgi ýaqytta sý tasqyny kezinde buzylǵan turmystyq tehnıka men jıhazdy baǵalaý boıynsha esep júrgizilip, daıyn bolǵannan keıin halyqqa keltirilgen shyǵyndy óteý bastalady.
Esterińizge sala keteıik, 25 naýryzda Qostanaı oblysyna kóp mólsherde sý keldi. Jangeldi jáne Amangeldi aýdandaryndaǵy eldi mekender, Arqalyq mańyndaǵy aýyldar sýǵa batty. Aımaqta 28 naýryzda tótenshe jaǵdaı jarııalandy.
Keıinnen Qarasý, Qostanaı oblysy men Qostanaı aýdanynda tótenshe jaǵdaı engizildi.
Arqalyqtaǵy alǵashqy páterlerdi Ekidiń aýylyndaǵy sý tasqynynan baspanasyz qalǵan 24 otbasy aldy.
