Qostanaıda tanymal telejýrnalıstiń shyǵarmashylyq keshi ótti
QOSTANAI. QazAqparat - Qostanaı qalalyq kontsert zalynda teleocherkter tsıklynyń, Otan jáne tanymal tulǵalar týraly fılmderdiń avtory, belgili telejýrnalıst Gúljibek Bekmuhamedovanyń shyǵarmashylyq keshi ótti. Sharaǵa oblys ákimdigi qoldaý kórsetken, dep habarlaıdy QazAqparat.
Ol 40 jyldyq shyǵarmashylyq qyzmetinde 50-ge jýyq derekti telejoba jasady. Biregeı adamzat tarıhynyń mánin ashýǵa tyrysty. Ómir men qoǵamnyń burylystaryn, zamannyń aǵymyn, jaratylys pen qubylystardy fılosofııalyq turǵyda paıymdaı bildi. Avtordyń týyndylary oblystyq jáne respýblıkalyq shyǵarmashylyq baıqaýlarda birneshe márte joǵary baǵalandy. Sonyń ishinde «Prezıdent – bizdiń oılarymyzdyń kórinisi» jáne «Kamshat Dónenbaeva. Men saǵan keldim, egis dalasy!..» atty eki derekti fılmi QR Tuńǵysh Prezıdentiniń qoryna endi.
Aıta ketý kerek, Gúljibek Bekmuhamedova 1955 jyly Qostanaı oblysynyń Áýlıekól aýdanynda dúnıege kelgen. Qazirgi ál-Farabı atyndaǵy Qazaq memlekettik ýnıversıtetiniń jýrnalıstıka fakýltetin úzdik bitirip, eńbek jolyn aýdandyq gazetten bastaǵan. Keıin jańadan ashylǵan Qostanaı oblystyq teleradıokompanııasy irgetasynyń qalanýyna mol úles qosty. Orys redaktsııasynyń bas redaktory qyzmetin atqaryp, ujymnyń qalyptasýyna, kórermen nazaryna tartymdy telehabarlar usyný jolynda kóp eńbek sińirdi. Sońǵy jyldary memleket jáne qoǵam qaıratkerleriniń, eńbek maıtalmandarynyń ómiri men erlik isterin arqaý etken derekti fılmderi jaryqqa shyqty jáne jurtshylyq tarapynan joǵary baǵasyn aldy.
Kesh barysynda óńir basshylary, eńbek ardagerleri, bilim jáne ǵylym, medıtsına salasynyń bilikti mamandary, quqyq qorǵaý organdarynyń ókilderi jáne ýnıversıtet jastary mereıtoı ıesin quttyqtap, júrekjardy pikirlerin bildirdi. Atap aıtqanda, Qostanaı oblysy ákiminiń orynbasary Marat Júndibaev, oblystyq ardagerler keńesiniń tóraǵasy, qoǵam qaıratkeri Kenjebek Úkın, saıasattanýshy, QR Parlamenti Májilisiniń IV shaqyrylymynyń depýtaty Valerıı Vıshnıchenko, álemge tanylǵan ǵalym-genetık Aıgúl Ábýǵalıeva, kitap shyǵarýshy, Bekmuhamedovanyń kýrstasy Valentına Zaharchenko, dańqty sportshy jáne jattyqtyrýshy, «Jekpe-jek» ulttyq sport federatsııasynyń jetekshisi Sabyrjan Mahmetov, sondaı-aq asyl tuqymdy mal óndirisin damytýdy jolǵa qoıǵan bilikti basshy, sheber uıymdastyrýshy, «Dıevka» agrofırmasynyń bas dırektory Oleg Danılenko mereıtoı ıesiniń shyǵarmashylyǵy jáne adamı asyl qasıetteri týraly oılarymen bólisti. Shetelden jáne elimizdiń ózge óńirlerinen jiberilgen beınebaıandyq quttyqtaýlar kórsetildi. Olar Gúljibek Baekeqyzynyń kóptegen jyldar boıy jýrnalıstıka salasynda jemisti eńbek etip, halyqtyń rýhanı baılyǵyn arttyrý úshin el tarıhynyń ıgiligine aınalǵan dúnıelerdi jaryqqa shyǵarǵanyn atap ótti.
G. Bekmuhamedovanyń teleefır arqyly taratylatyn jáne azamattyq pen patrıotızmge negizdelgen avtorlyq jumystary murajaılar, kitaphanalar men muraǵattar qorlaryn tolyqtyrdy. Sonymen qatar bilim berý, mádenıet, memlekettik organdardyń qyzmetkerleri taqyryptyq is-sharalar ótkizý kezinde keńinen qoldanylady. Qaıshylyqtar oryn alyp jatqan qazirgi zamanda qoǵamdyq oń pikirdi qalyptastyrýda osyndaı telejobalardyń alatyn róli óte zor ekeni daýsyz.
Іs-shara sońynda Almaty qalasynan, Qazaqstan Jýrnalıstıka Akademııasynyń prezıdenti, professor Saǵymbaı Qozybaevtan qýanyshty habar kelip tústi. Onda medıa qoǵamdastyqqa tanymal teledokýmentalıst, Qazaqstannyń qurmetti jýrnalısi Gúljibek Bekmuhamedovany Respýblıkalyq Jýrnalıstıka akademııasynyń músheligine qabyldaý týraly sheshim shyǵarylǵany jetkizildi. Keshke qatysýshylar bul jańalyqty qýana qabyl alyp, mereıtoı ıesine qoshemet bildirdi.
Sahna sheberleri daryndy jýrnalıst ári stsenarıst Gúljibek Baekenqyzyna ózderiniń eń úzdik kontserttik nómirlerin arnady. Kesh sońynda avtor jurtshylyqqa rızashylyǵyn bildirip, aldaǵy josparlary týraly aıtty.
