Qostanaıda tanymal brend kıimin satqan kásipker sotta saýdasynyń zańdy ekenin dáleldep shyqty
QOSTANAI. QazAqparat - Jitiqara aýdanynyń turǵyny kontrafaktilik ónimdi saqtaǵany jáne taratqany úshin aıyptaldy, dep habarlaıdy «QazAqparat» HAA tilshisi
Jitiqara aýdandyq ádilet basqarmasy kásipker Abaı Qanatbaevtyń sporttyq taýarlar dúkenine tekserý júrgizgen. Atqarýshy organnyń tekserý júrgizýine «Adidas» kompanııasynyń Qazaqstandaǵy úsh ókiliniń atynan túsken ótinim sebep bolǵan. Al ádilet basqarmasynyń qyzmetkerleri kásipkerdi kontrafaktilik ónimdi saqtady jáne taratty dep aıyptady.
«Men birneshe jyl boıy Jitiqaradaǵy saýda ortalyqtardyń birinde «Adıdas» brendiniń ónimderin satýmen aınalysamyn. Turaqty tutynýshylarym bar. Kıimderdi «Adidas» kompanııasynyń seriktesinen alyp turamyn. Tekseris kezinde meniń qolymda kelisimshart qaǵazy bolmaı, 160 myń teńge turatyn taýarym tárkilenip, ákimshilik is qozǵaldy. Sóıtip, jeke múddemdi qorǵaý úshin óńirlik kásipkerler palatasynyń zańgerlerine júgindim», - dedi kásipker.
Osylaısha, Abaı Qanatbaev óziniń kásibin zań turǵysynda durys júrgizip otyrǵanyn dáleldedi. Tergeý sharalary barysynda jeke kásipker «Adidas» kompanııasynyń belgisi bar sporttyq kıimderdi «Kýbok» JShS-nan satyp alǵany anyqtaldy. «Kýbok» JShS «Adidas» kompanııasynyń seriktesi ári iri kóterme tutynýshysy ekeni belgili boldy.
Nátıjesinde sot Qanatbaevtyń eshqandaı quqyq buzbaǵanyn rastady. Onyń taýarlary qaıtarylyp, salynǵan aıyppul somasy joıyldy.
