Qostanaıda tabylǵan adam qańqalary: Polıtsııa mán-jaıdy aıtty

QOSTANAI. QazAqparat – Qostanaıda qubyrlardy aýystyrý kezinde tabylǵan qańqalar saraptamaǵa jiberilip, bir aıda adamdardyń qaıtys bolý merzimi anyqtalatyn bolady, dep habarlaıdy QazAqparat tilshisi.

«Keshe saǵat 14:30-da Qostanaı jylý elektr kompanııasy qyzmetkerlerinen habarlama kelip tústi. Qubyrlardy aýystyrý kezinde eki adamnyń súıegi tabylǵan. Olardyń jeke basyn anyqtaý boıynsha tergeý amaldary júrgizilip jatyr.

Qostanaı jylý elektr kompanııasy qyzmetkerlerinen habarlama búgin de tústi. Aldynda tabylǵan qańqalarǵa jaqyn jerde taǵy bir adamnyń súıegi anyqtaldy. Faktiler boıynsha qylmystyq is qozǵaldy, saraptamalar taǵaıyndaldy. Tolyq aqparatty QR Qylmystyq-protsestik kodeksiniń 201-baby negizinde jarııalaı almaımyz» - dedi polıtsııanyń ońtústik bóliminiń aǵa tergeýshisi Jasyn Sardarov.

Polıtsııa maıorynyń habarlaýynsha, jınalǵan materıaldardy saraptaý orta eseppen bir jarym aıǵa sozylady.

Sardarovtyń aıtýynsha, máıitter tabylǵan jerde zırat bolmaǵan. Sondyqtan bul adamdar jerlengeni týraly boljaýǵa negiz joq. Adamdardyń jeke basyn anyqtaý sarapshylar úshin de qıynǵa soǵyp tur. Biraq kıgen kıimderine qaraǵanda, olar er adamdar bolýy yqtımal.

«Olardyń jeke basyn anyqtaý oblys boıynsha iz-túzsiz joǵalǵandardyń tizimin tekserý arqyly anyqtalady. Biraq barlyq málimetter saraptamadan keıin ǵana jarııalanady.

Saraptama qorytyndysy boıynsha olardyń qaıtys bolý merzimi de belgili bolady», - dep túıindedi J.Sardarov.

Buǵan deıin Qostanaıdaǵy kommýnaldyq qyzmetter qubyrlardy jóndeý kezinde adam súıekterin tapqany habarlanǵan bolatyn. Búgin kommýnaldyq qyzmetkerler taǵy bir adamnyń máıitin baıqady.