Qostanaıda sýdıalardyń biliktilikterin arttyrý baǵytynda aýqymdy jumystar atqarylýda - Joǵarǵy sot sýdıalarynyń jalpy otyrysy
ASTANA. Shildeniń 9-y. QazAqparat /Aıdar Ospanalıev/ - «Qazirgi tańda elimizdiń sot júıesine basa kóńil bólinýde. Onyń sebebi qoǵamdaǵy barlyq daýly máseleler men laýazymdy tulǵalardyń zańsyz áreketteri boıynsha shaǵymdar sot organdarynda sheshiledi.
Óz kezeginde sot qyzmetkerleri Konstıtýtsııa men ózge de zańdar negizinde berilgen quqyqtar men sot bıiligin júzege asyrýdaǵy ózderiniń ókilettikterin paıdalanyp, memlekettiń bedeli men abyroıyn ósirýge kóp kúsh salýy qajet», dedi búgin Qostanaı oblystyq sotynyń tóraǵasy Baǵlan Maqulbekov. Bul týraly ol búgin elimizdiń sot júıesiniń jarty jyldyq qorytyndysyna arnalǵan Joǵarǵy sot sýdıalarynyń jalpy otyrysynda aıtty.
Onyń sózine qaraǵanda, Qostanaı oblystyq sotynyń sýdıalary ózderine júktelgen osy mindetterdi jaqsy túsinedi. «Jalpy elimizdiń sot júıesi jóninde aıtatyn bolsaq, sot qyzmetkerleriniń basty nazary Qazaqstan halqynyń quqyqtary men bostandyqtaryn zańda kórsetilgen talaptar negizinde qorǵaý bolyp tabylady. Osy baǵytta Qostanaı oblysynda birshama ıgi ister atqaryldy. Atap aıtqanda, elimizde azamattyq isterdi belgilengen merzimde qaraý jáne azamattyq daýlar boıynsha zań normalaryn durys qoldanýda birshama jumystar atqaryldy. Qylmystyq ister boıynsha basty nazar osy isterdiń ýaqytynda qaralyp, kináli azamattyń áreketine saı keletin jazany qoldanýǵa baǵyttalyp otyr. Sondaı-aq jańa zaman talaptaryna baılanysty sýdıalar ózderiniń biliktilikterin arttyrý maqsatynda jáne sýdıalyqqa úmitkerlermen jumys baǵytynda da birshama jumystar atqardy», dedi oblystyq sot tóraǵasy.
