Qostanaıda sýdıaǵa para bermek bolǵan advokat ustaldy
QOSTANAI. QazAqparat - Búgin Qostanaıda sot advokat Jeńis Dosmaǵambetovke qatysty sanktsııany qarady, dep habarlaıdy «QazAqparat» HAA tilshisi oblystyq sottyń baspasóz qyzmetine silteme jasap.
«Búgin Qostanaıdyń mamandandyrylǵan tergeý soty advokat Jeńis Dosmaǵambetovti 2 aı úıqamaqqa alýǵa qatysty sharany sanktsııalaý jónindegi ótinishti qanaǵattandyrdy»,-dep habarlady oblystyq sot.
Advokatqa jaýapty memlekettik qyzmette isteıtin tulǵanyń iri kólemde qarjy alýyna yqpal etti degen kúdik keltirilip otyr.
Jeńis Dosmaǵambetov 17 qazan kúni Áýlıekól aýdandyq sotyna 1 mln teńge kóleminde para berý kezinde qolǵa tústi. Ony Sybaılas jemqorlyqpen kúres ulttyq bıýrosynyń qyzmetkerleri ustap, Rýdnyı qalasynyń ýaqytsha ustaý ızolıatoryna otyrǵyzdy.
