Qostanaıda sý tasqynyn baqylaıtyn komıssııa quryldy
QOSTANAI. QazAqparat - Sý tasqyny jaǵdaıyn baqylaý komıssııasy Rýdnyı jáne Lısakov qalalaryn, sondaı-aq Taran, Denısov, Jitiqara jáne Qamysty aýdandarynyń aýmaqtaryn tekserip shyqty, dep habarlaıdy QazAqparat oblystyq TJD-ǵa silteme jasap.
Óńirde sý tasqyny jaǵdaıyn baqylaý boıynsha arnaıy komıssııa quryldy. Quramynda oblystyq TJD bastyǵy Talǵat Kákimov, «Qazsýshar» RMK oblystyq fılıalynyń dırektory Dáýren Ábdiqamıtov, «Qazgıdromettiń» oblystaǵy dırektory Larısa Kýzmına bastaǵan top tikushaqpen batys aýdandardaǵy sý tasqyny jaǵdaıyn baqylap ótti.
«Ushý barysynda Tobyl ózeniniń basseınderinde, sondaı- aq, Qaratomar jáne Joǵarǵy Tobyl sý qoımalarynda qardyń joqtyǵy baıqaldy. Jalpy, Qostanaı oblysynyń aýmaǵynan qatty sý aǵysy kútilmeıdi, Reseı Federatsııasy tarapynan Birsýat jáne Sıntashty ózenderiniń aǵynynda da qar sýy az. Tobyl, Aıat, Qamystyaıat, Jelqýar ózenderinde muz ketpegen. Bul ózenderde sý deńgeıi birqalypty. Aqqarǵa gıdroposty aýdanyndaǵy Tobyl ózeniniń joǵarǵy jaǵy qurǵaq», - dep málimet beredi oblystyq TJD Zilzalalardyń qaýip-qaterin azaıtý jáne azamattyq qorǵaý salasy basqarmasy.
Qazirgi ýaqytta Áýlıekól, Naýryzym, Qarasý aýdandarynyń qary keı jerlerde tolyq erigenimen, keı aýmaqtarda ketpegen. Sonymen qatar, Aqmola oblysy mańyndaǵy Esil jáne Derjavın aýdanynda qar jamylǵysy tutas. Ashýtasty jáne Aqjar sý qoımalary muzynyń ústinde keı jerlerde qar jaýyp, muz jaǵadan ketken.
«Qostanaıǵa sý Qaraǵandy oblysy jaǵynan kelýde. Amangeldi aýdanynyń soltústiginde ornalasqan barlyq ózender muz astynda tur, keı jerlerde muz ústinde oıyqtar men jıekter baıqalady. Qabyrǵa men Torǵaı ózenderi muzben jabylǵan, búıirlik aǵystar baıqalmaıdy, dalada qar joq. Naýryzym aýdanynyń Dámdi aýyly mańynda jergilikti ózen arnasy keýip qalǵan», - deıdi vedomstvo ókilderi.
