Qostanaıda sý tasqyny bolady dep kútilýde
QOSTANAI. 13 tamyz. QazAqparat - Qaratomar sý qoımasynan sýdyń kóp shyǵarylýynan Tobyl ózeniniń deńgeıi kóterilýi múmkin. Bul týraly búgin Qostanaı oblysy ákiminiń orynbasary Serik Bekturǵanov málim etti.
Mamandardyń bergen baǵasyna qaraǵanda, shyǵarylǵan sýdyń kólemi sońǵy kúnderi segiz esege ósken - sekýndyna 25-ten 200 tekshe metrge deıin. Topan sý Qazaqstanǵa RF-nyń birneshe kúnnen beri kóp mólsherde jaýyn-shashyn túsken Chelıabi oblysynan keldi.
Osyǵan deıin habarlaǵandaı, 10 tamyzdan beri Qostanaı oblysyna da sý tasqyny jetti: Qarabalyq, Taran jáne Fedorov aýdandarynyń eldi mekenderin sý basý qaýpi tóndi. Reseılik áriptesteriniń der kezinde habarlaýyna baılanysty, qazaqstandyq qutqarýshylar sý tasqyny saldarynyń sál de bolsa aldyn aldy. Degenmen, qutqarý jumystarynyń barysynda 300-den astam adam kóshirildi degen habar bar.
Qostanaı oblysy TJD baspasóz qyzmetiniń bergen aqparaty boıynsha, sý tasqynyn joıý úshin oblystyń jaqyn mańynan QR TJM qutqarýshylary keldi. Zardap shekkenderge psıhologııalyq kómek kórsetilýde. Dál qazirgi ýaqytta Taran, Qarabalyq jáne Fedorov aýdandarynda sý deńgeıi tómendedi. Alaıda Qostanaı oblysynyń ákimi Nuraly Sádýaqasov qaýip-qater tolyqtaı joıylǵansha sý basý qaýpi bar zonany baqylaý jumystaryn toqtatpaý jóninde tapsyrma berdi.
Qostanaıda kesheden beri turǵyndar men saıajaı ıelerine sý basý qaýpi týraly túsindirý jumystary júrgizilip jatyr.
