Qostanaıda sý tasqyny zalaly eseptelip, ótemaqy berilip jatyr

ASTANA. KAZINFORM – Qostanaı oblysynda sý tasqynynan zardap shekkenderge 187 mln teńge álemýettik tólem berildi. Bul týraly oblys ákiminiń orynbasary Erlan Spanov aıtyp berdi.

Óńirdiń eki qalasynda jáne 4 aýdanynda tótenshe jaǵdaı jarııalanǵan.

«Atalǵan aýmaqtardyń barlyǵynda zardap shekkenderge zalaldy óteý boıynsha komıssııalar qurylyp, jumys jasap jatyr. Tólem týraly sheshimderdi komıssııalar jyljymaıtyn, jyljymaly múlik pen maldy baǵalaýdan keıin jáne tehnıkalyq tekserýden keıin qabyldaıdy», - dedi spıker Respýblıkalyq aqparattyq shtabta ótken brıfıngte.

Búgingi kúni 609 úı tekserildi, qalpyna keltirilmeıtin 269 úı ıesine jańa baspana beriledi.

Zardap shekken halyqqa áleýmettik qoldaý jumystary sý tasqynynyń alǵashqy kúnderinen bastap júrgizilýde. Ázirge 828 ótinish boıynsha 187 mln teńge tólendi, ótinishterdi qabyldaý jáne tóleý jumystary jalǵasýda.

Sonymen qatar sý tasqyny saldarynan 976 mal qyrylǵan. Ázirge onyń 214-i boıynsha tólem jasaldy.

«Elektr jelileriniń 1414 tiregi zaqymdalǵan, sonyń ishinde 52 joǵary voltty tirek bar. Barlyq iri eldi mekenderde elektrmen jabdyqtaý qalpyna keltirildi, biraq shamamen 16 shaǵyn eldi meken áli kúnge deıin elektr qýatynsyz qalyp otyr. Qazirgi ýaqytta smeta ázirlendi, qajetti materıal men tirekter daıyndalýda», - dep tolyqtyrdy E. Spanov.