Qostanaıda sý baǵasy taǵy da qymbattady
Aıta ketý kerek, Ulttyq ekonomıka vıtse-mınıstri Serik Jumanǵarın jańa jyldan bastap kommýnaldyq tarıfterge 10 paıyz qosylatynyn málimdegen edi. Al tabıǵı monopolııalardy retteý jáne básekelestikti qorǵaý komıtetiniń Qostanaı oblystyq departamenti taratqan málimetke súıensek, baǵa 2016-2020 jyldarǵa arnalǵan josparǵa sáıkes kóterildi.
«Aldymen, turǵyndardyń kommýnaldyq tólemderge degen qaryzdaryn tekseretin bolamyz. Bizge jetken málimetter boıynsha, oblys turǵyndary kásiporynǵa 60 mln teńge qaryz. Onyń ústine, «Qostanaı-Sý» tutynýshylardan túsken qarajatpen óziniń nesıesin jaýyp otyr. Endi birinshi jartyjyldyqta qostanaılyqtar sýǵa 10 paıyz artyq tóleıdi», - dep túsindirdi «Qostanaı-Sý» MKK basshysy Erkebulan Faızýlaev.
Faızýlaev atap ótkendeı, sýdyń bir tekshe metri úshin 84,59 teńge, káriz júıesine 71,68 teńge tóleıdi.
«Qaryzy kóp turǵyndar kommýnaldyq tólemaqynyń túbirtegin alǵan kúnnen bastap, bizdiń kásiporynǵa kelýi tıis. Sodan soń olarmen kelisimshart jasasyp, qaryz somasyn qaıta eseptep, bólip tóleýge múmkindik beremiz», - deıdi kásiporyn basshysy.
