Qostanaıda stýdentter úshin 5 jataqhana salynady

QOSTANAI. QazAqparat – Qostanaı oblysynyń ákimi Arhımed Muhambetov turǵyndarǵa esep berý kezdesýinde jataqhana máselesiniń tolyqtaı sheshiletinin aıtty, dep habarlaıdy QazAqparat.

Osy ýaqytqa deıin stýdentterdi baspanamen qamtý - túıini sheshilmeı turǵan másele sanatynda bolǵan. Endi bul olqylyqtyń orny tolmaq.

«Stýdentterdi ýaqytsha baspanamen qamtamasyz etý maqsatynda Ó.Sultanǵazın atyndaǵy Qostanaı memlekettik pedagogıkalyq ýnıversıteti jalpy quny 707,2 mıllıon teńgege 336 orynǵa arnalǵan jataqhana salyp jatyr. Budan bólek Qostanaı qalasynda 4 stýdent úıin salý josparlandy. Atap aıtqanda, Qostanaı medıtsınalyq kolledji, joǵary polıtehnıkalyq kolledji, avtomobıl kóligi kolledji, A.Baıtursynov atyndaǵy QMÝ bazasynda jataqhana boı kóteredi», - dedi aımaq ákimi.

Arhımed Muhambetov sapaly bilim berýge qajetti jaǵdaı jasaý úshin jyl saıyn oblys bıýdjetinen qomaqty qarjy bólinetinin aıtty. Máselen, byltyr bilim salasynyń shyǵyndaryna 80,2 mlrd teńge baǵyttalǵan.

«Qostanaı qalasynda 900 orynǵa arnalǵan 2 mektep ashyldy. «Áýejaı» shaǵyn aýdanyndaǵy orta mektep jáne memlekettik tilde oqytatyn mektep-gımnazııa óńirdegi úsh aýysymdy oqytý máselesin tolyǵymen sheshýge múmkindik berdi. Oblysta taǵy eki mekteptiń qurylysy bastaldy. 21 bilim berý obektisi kúrdeli jóndeýden ótti. 2020 jyly 15 bilim nysanyna 2,9 mlrd teńgege kúrdeli jóndeý júrgizý josparlanyp otyr», - dep tolyqtyrdy Arhımed Muhambetov.