Qostanaıda sport mektebiniń bas býhgalteri iri kólemde aqsha jymqyrdy dep aıyptaldy
QOSTANAI. QazAqparat - Qostanaıda iri kólemde aqsha jymqyrdy degen aıyppen fýtboldan balalar sport mektebiniń bas býhgalteri Olesıa Datsıeva sot aldynda jaýap berdi. Memlekettik aıyptaýshynyń aıtýynsha, ol jalpy alǵanda 3 mln. 448 myń 338 teńgeni qoldy etken. Bul soma Qostanaı oblystyq máslıhattyń revızııalyq komıssııanyń tekserisi kezinde anyqtaldy, dep habarlady QazAqparat.
Alaıda, sotta aıyptalýshy Datsıeva qylmys jasamaǵanynn aıtty. Onyń sózine qaraǵanda, bul qarajat urlanbady, ol mektep oqýshylary men bapkerlerdiń túrli jarystarǵa qatysýyn qamtamasyz etý úshin jáne issapar shyǵynyn óteý úshin kartalarǵa aýdarý jáne qolma qol berý arqyly jumsalǵan.
Datsıeva býhgalterııadan qarjy qujattary salynǵan papkanyń joǵalýy saldarynan osyndaı aıyptar taǵylyp otyrǵanyn jetkizdi. Degenmen onyń sózine qaraǵanda, qarajattyń qaıda aýdarylǵanyn bank arqyly baqylaýǵa bolady, sondaı-aq ony býhgalterııadan aqsha alǵan kýágerler - jattyqtyrýshylar men oqýshylar rastaı alady. Sot otyrysy jalǵasyp jatyr.
