Qostanaıda sport kesheninde oq jaýdyrǵan stýdentke úkim shyqty
QOSTANAI. QazAqparat - Búgin qostanaılyq stýdent Danabek Smaılovqa úkim shyqty, ol eki aı buryn «Trýdovye rezervy» sport kesheninde oq atqan bolatyn, dep habarlaıdy «QazAqparat» HA tilshisi.
Qostanaı oblystyq sotynyń baspasóz qyzmetiniń aqparaty boıynsha, is qysqa retpen qaralǵan. Tergeý barysynda aıyptalýshy óz kinásin tolyqtaı moıyndap, prokýrormen protsessýaldyq kelisim jasasty. Smaılovtyń aıtýynsha, ol qarsylasyna oq atqan travmatıkalyq tapanshany 2016 jyldyń sońynda kósheden taýyp alǵan.
Danabek Smaılov 3 jylǵa bas bostandyǵynan aıyryldy. Oǵan qatysty probatsııalyq baqylaý belgilendi. Sottalýshy mekenjaıyn ózgertpeýge jáne óziniń qaıda baratyny týraly ókiletti organdarǵa habarlap otyrýǵa mindetteldi. Oǵan kóńil kóterý oryndaryna barýǵa tyıym salyndy.
Buryn habarlanǵandaı, 16 qańtar kúni «Trýdovye rezervy» qostanaılyq sport kesheninde boksshy-stýdentter arasynda daý týyp, sońy tóbeleske ulasqan. Smaılov «Osa» travmatıkalyq tapanshasymen qarsylasynyń kókiregine jáne basyna atyp, qatty jaraqattaǵan. Oqıǵa saldarynan qonaqtar men sport mekemesiniń qyzmetkerleri evakýatsııalandy.
