Qostanaıda sot bógetterdi qalpyna keltirýge bólingen qarjyǵa qatysty isti qarap jatyr
ASTANA. KAZINFORM — Qostanaı qalasynyń № 2 sotynda 2024 jylǵy iri sý tasqynynan keıin gıdrotehnıkalyq nysandardy qalpyna keltirýge qatysty qylmystyq is qaralyp jatyr. Sot aldynda burynǵy eki sheneýnik pen qurylys kompanııasynyń basshysy jaýap berip otyr.
Qostanaı qalasynyń № 2 sotynda Qarasý aýdanyndaǵy sý tasqynynan keıin gıdrotehnıkalyq qurylystardy qalpyna keltirý jumystaryna qatysty qylmystyq isti qaraý jalǵasyp jatyr. Aıyptalýshylar qatarynda burynǵy laýazymdy qyzmetkerler men Almatydaǵy «Soıýztehstroı» JShS dırektory Ivan Sorokın bar.
Aıyptaý nusqasy boıynsha qurylys jumystary saraptamanyń oń qorytyndysynsyz júrgizilgen, kelisimsharttar keıinnen rásimdelgen, al bıýdjetten qarjy bólýge arnalǵan ótinimder zań buzýshylyqtarmen berilgen. Qarjylandyrý máselelerin sheshýge kómekteskeni úshin sheneýnikter kásipkerden eki mıllıon teńgeden alýy kerek bolǵan degen boljam bar.
Burynǵy laýazymdy tulǵalarǵa QR Qylmystyq kodeksiniń 366-baby 2-bóligi boıynsha, ıaǵnı edáýir mólsherde para alý nemese zańsyz áreketter jasaǵany (áreketsizdigi) úshin aıyp taǵylǵan. Al «Soıýztehstroı» JShS dırektory Qylmystyq kodekstiń 367-baby 3-bóliginiń 3-tarmaǵy boıynsha birneshe ret para berdi dep aıyptalyp otyr.
Kezekti sot otyrysynda iske qatysty qujattar men dáleldemeler zertteldi. Aldymen jazbasha materıaldarǵa nazar aýdaryldy. Sotta qylmystyq istiń qujattary, jaýap alý jáne tekserý hattamalary, qujattar men tergeýge qatysy bar hat-habarlar qaraldy.
Jazbasha materıaldardy zerttegennen keıin sot aýdıojazbalardy, hat almasýlardy jáne elektrondyq tasymaldaǵyshtardy tekserý materıaldaryn qaraýǵa kiristi.
Zerttelgen áńgimelerdiń biri qurylys jumystarynyń aqysyn tóleý jáne merdigerdiń jergilikti atqarýshy organdar ókilderimen qarym-qatynasyna qatysty boldy. Jazbalardyń birin tyńdaǵannan keıin Ivan Sorokın uzaq ýaqyt boıy atqarǵan jumystarynyń aqysyn alýǵa tyrysqanyn aıtty.
— Meniń mindetim nede bolǵanyn túsinesiz be? Bir jyl boıy atqarǵan jumysymnyń aqshasyn alýǵa tyrystym, — dedi aıyptalýshy.
Kásipkerdiń aıtýynsha, bastapqyda oǵan nysandardy qalpyna keltirý jumystarynyń aqysyn tóleımiz dep ýáde bergen. Alaıda keıin jobalyq qujattardy rásimdeý jáne saraptamadan ótkizý kezinde qıyndyqtar týyndaǵan.
Sorokınniń sózinshe, tapsyrys berýshiniń mindetine kiretin birqatar máseleni ózi sheshýge májbúr bolǵan. Aıyptalýshy kelispeýshilikter týyndaǵan kezde qurylys jumystarynyń 90 paıyzy oryndalyp qoıǵanyn atap ótti.
Materıaldardy ári qaraı zertteý barysynda bıýdjet ótinimderin daıyndaý, kelisimsharttar jasasý jáne nysandardy paıdalanýǵa berý qujattaryn rásimdeýge qatysty áńgimeler tyńdaldy. Jazbalardyń birinde taraptar bıýdjet ótinimin joldaý men qajetti qujattardyń daıyn bolýyn talqylaǵan.
Sorokınniń aıtýynsha, jergilikti atqarýshy organdardyń ókilderi jobalardyń júzege asý barysynan habardar bolǵan. Kásipker qurylys jumystaryn jalǵastyrmas buryn kelisimsharttar men oryndalǵan jumystardyń aktilerine qol qoıýdy talap etkenin túsindirdi. Onyń aıtýynsha, osylaısha tólemniń jasalýyna kepildik alǵysy kelgen.
Ol sózin rastaý úshin áńgimelerdiń birindegi mynadaı dıalogty keltirdi:
— Ol maǵan: «Sen jumysty isteı ber, aqshasyn keıin tóleımiz», — deıdi. Men: «Joq, aldymen barlyq qujatqa qol qoıyp, bárin rásimdeńizder. Sodan keıin qalǵan jumysty jalǵastyryp, aıaqtaımyn», dedim, — dep túsindirdi aıyptalýshy.
Onyń sózinshe, sol kezde negizgi qurylys jumystary aıaqtalǵan, tek jekelegen jabdyqtardy ornatý qalǵan. Sorokınniń aıtýynsha, keıbir nysandardy paıdalanýǵa berý máseleleri onyń mindetine kirmegen.
Aýdıo jáne beınematerıaldardy zertteý kezinde qorǵaý tarapy men memlekettik aıyptaýshy arasynda sotta naqty qandaı jazbalardy qaraýǵa bolatyny jáne olardyń taǵylǵan aıypqa qatysy jóninde pikirtalas týyndady.
Advokattardyń biri kórsetilip jatqan materıaldardyń bir bóligi qorǵaý tarapynyń pikirinshe, zattaı dáleldeme retinde tanylmaǵanyn jáne saraptamadan ótpegenin aıtty.
— Prokýror qazir aıtyp otyrǵan jazbalar tek tekserý hattamasynyń negizine alynǵan materıaldar. Bul jazbalar is boıynsha zattaı dáleldeme retinde tanylmaǵan, sondaı-aq taǵylǵan aıyptyń aýqymyna kirmeıdi, — dedi qorǵaýshy.
Memlekettik aıyptaýshy Dáýren Derbesov bul pikirmen kelispedi. Prokýror zerttelip jatqan málimetter qylmystyq is materıaldaryna engizilgen tekserý hattamalarynda bar ekenin aıtty. Sondaı-aq ol barlyq jazba saraptamaǵa jiberilmegenin, alaıda bul olardyń tergeý materıaldarynda joq ekenin bildirmeıtinin jetkizdi.
Osyǵan baılanysty zerttelip jatqan faıldardyń protsestik mártebesin qosymsha naqtylap, olardy saraptama qorytyndylary jáne aıyptaý aktisimen salystyrý qajettigi týyndady. Sot protsesi jalǵasyp jatyr.
Buǵan deıin Qostanaı oblysynda sot 2024 jylǵy sý tasqyny kezinde qyrylǵan 10 bas usaq mal úshin ótemaqy tóleýden bas tartýdy zańsyz dep tanydy.
