Qostanaıda soǵys ardagerine 73 jyl burynǵy ordeni qaıtaryldy
QOSTANAI. QazAqparat - Ekinshi dúnıejúzilik soǵys ardageri, 92 jastaǵy Aleksandr Ahrameev «Qyzyl Juldyz» ordenimen marapattaldy, dep habarlaıdy QazAqparat.
Qostanaıǵa Reseı Federatsııasynyń Qazaqstandaǵy elshiliginiń ókili arnaıy keldi. Basty sebep - Ekinshi dúnıejúzilik soǵys ardageri Aleksandr Ahrameevke «Qyzyl juldyz» ordenin taǵý. Negizi, ardager bul marapatty 73 jyl buryn alýy tıis edi. Biraq, marapattalýshylardyń tiziminde onyń tegi «Ohrameev» dep kórsetilipti.
«Bir áriptiń durys jazylmaýy saldarynan ardager ózine tıesili ordendi ýaqytynda taǵa almady. Aleksandr Nıkolaevıch 1945 jyly óziniń atqyshtar brıgadasymen birge Berlınge baratyn platsdarmdy ashyp berdi. Ardagerdiń bul eńbegi ólsheýsiz», - dedi RF elshiliginiń ókili Andreı Grışýk ardagerge ordendi taǵyp.
Al marapat ıesi Aleksandr Ahrameev 73 jyl buryn bolǵan oqıǵany eske alyp, esteligimen bólisti.
«1945 jyldyń sáýir aıynda men Kenıgsberg operatsııasyna qatystym. Sońǵy shaıqas aýyr tıdi. Sheginerge jol joq. Oq-dáriniń azdyǵyna qaramastan alǵa júre berdik. Aqyry óz degenimizge jettik. Qala baǵyndy. Kenıgsbergten soń Baltıısk qalasyn basyp aldyq. Sodan keıin Berlınge barar jol ashyldy», - dedi soǵys qatysýshysy.
Aleksandr Ahrameev ásker qataryna Qostanaı oblysynyń Fedorov aýdanynan 17 jasynda alyndy. Soǵys kezinde pýlemetshi bolǵan. Soǵys aıaqtalǵan soń 1959 jylǵa deıin Kamchatkada áskerı qyzmetterdi atqardy. Kapıtan shenin aldy.
Aıta keteıik, búginde Qostanaı oblysynda 53 Ekinshi dúnıejúzilik soǵystyń qatysýshysy turady. Eń jasy - 93-te.
