Qostanaıda sırek kezdesetin janýarlardy aýlaýmen aınalysqan brakonerler ustaldy
ASTANA. KAZINFORM – Qostanaı oblysynda polıtseıler qarda júretin kólikpen brakonerler tobyn ustady, dep habarlaıdy Polisia.kz.
Qostanaı oblysynda "Brakoner" respýblıkalyq jedel aldyn alý is-sharasy barysynda quqyq qorǵaý organdary sırek kezdesetin jáne qorǵalatyn janýarlardy zańsyz aýlaýmen aınalysqan uıymdasqan toptyń qyzmetin toqtatty. Operatsııany Qostanaı oblysy polıtsııa departamentiniń uıymdasqan qylmysqa qarsy kúres basqarmasy men tabıǵat qorǵaý bólimshesiniń qyzmetkerleri "Arlan", "Búrkit" jáne jyldam qımyldaıtyn arnaıy jasaqtyń mamandarymen birlesip júrgizdi.
Fedorov aýdanynyń Lesnoe aýylynda, kezekti zańsyz ańshylyqtan qaıtyp kele jatqan bes er adam qolǵa tústi. Tergeý barysynda olardyń aldyn ala sóz baılasý arqyly oblys aýmaǵynda brakonerlik áreketti uıymdastyrǵany anyqtaldy.
Qarý-jaraq pen ańshylyq oljalaryn tasymaldaý úshin olar alty qarda júretin kólik pen bes jol talǵamaıtyn kólikti paıdalanǵan. Sondaı-aq brakonerler ańdardy izdeýde dron, ratsııa jáne jylýǵa den qoıǵysh qurylǵylardy qoldanǵan.
Tekserý barysynda kólik quraldarynyń júksalǵyshynan Sibir elikteriniń tórt ushasy tabyldy.
Sonymen qatar Rýdnyı men Qashar qalalarynda jáne aınaladaǵy eldi mekenderde júrgizilgen tintý barysynda ártúrli markadaǵy tirkelmegen ańshylyq myltyqtar men túrli kalıbrli oq-dáriler, sileýsin, qasqyr, aqbóken múıizderi, jabaıy janýarlardyń bastary men eti tárkilendi.
Top músheleriniń aıtýynsha, olar ormandy alqaptarǵa turaqty túrde baryp, jabaıy ańdardy zańsyz aýlaǵan. Oljadan keıin janýarlardyń óleksesin soıyp, etin satýmen aınalysqan.
Sonyń ishinde olardyń qasqyr terisin arnaıy kilem jasaý úshin qoldanbaq bolǵany belgili boldy. Polıtseıler bul terini tárkilep, taksıdermıstke (tulyptar jasaıtyn sheberge) tapsyrys berý arqyly muzdatylǵan qasqyrdy tulypqa aınaldyrýǵa árekettengenin anyqtady.
Qazirgi tańda atalǵan fakti boıynsha adamdar tobynyń zańsyz ań aýlaýy jáne tirkelmegen qarýdy qoldanýy boıynsha sotqa deıingi tergeý júrgizilýde. Qylmystyq toptyń árbir múshesiniń róli men olardyń basqa da zańsyz áreketterge qatystylyǵy tekserilip jatyr.
Qostanaı oblysy polıtsııa departamenti mundaı tabıǵatqa zalal keltiretin zańsyz áreketterge qatań shara qoldanylatynyn atap ótti. Quqyq qorǵaý organdary tabıǵatty qorǵaý baǵytynda jumystaryn odan ári jalǵastyrady.
Buǵan deıin Atyraýda mototsıklmen shana súıregen brakonerlerden 530 keli balyq tárkilengen.