Qostanaıda shyǵarylǵan avtokólikter Ózbekstanǵa eksporttalady
QOSTANAI. QazAqparat – Qostanaı oblysynyń ákimi Arhımed Muhambetov Tashkent qalasyndaǵy Qazaqstan men Ózbekstannyń 2-shi aımaqaralyq yntymaqtastyq forýmyna qatysty, dep habarlaıdy QazAqparat oblys ákiminiń baspasóz qyzmetine silteme jasap.
Qos eldiń Úkimet basshylary qatysqan jıynda agroónerkásiptik, ónerkásiptik kooperatsııa, ónerkásip jáne týrızm salasyndaǵy óńirlik bıznestiń yntymaqtastyǵy týraly máseleler talqylandy. Aıtýly sharada Qostanaı oblysynyń ákimi Arhımed Muhambetov óńirdiń avtokólik shyǵarý salasyn tanystyrdy.
«Ózbekstan Respýblıkasynyń aımaqtarymen ótken jylǵy saýda aınalymy 34,9%-ǵa ósip, 150 mln AQSh dollaryna jetti. Forýmda 2020-2021 jyldarǵa arnalǵan Tashkent oblysynyń hokımııaty men Qostanaı oblysynyń ákimdigi arasyndaǵy ózara yntymaqtastyq týraly memorandýmǵa qol qoıyldy. Ózara áriptestik aıasynda Qazaqstan Respýblıkasynyń aýmaǵynda óndirilgen avtomobılderdi satý jáne eksporttaý úshin «Avtosanoat invest» JShQ, «SaryarqaAvtoProm» JShS jáne «Grýppa kompanııa Allıýr» AQ arasyndaǵy birlesken kásiporyn týraly kelisimdi iske asyrý jónindegi is-sharalar jospary jasaldy», - delingen baspasóz qyzmetiniń aqparatynda.
Aıta keteıik, byltyr Qostanaı oblysynda 26 myńǵa jýyq kólik qurastyrylǵan.
