Qostanaıda shomylý maýsymy bastalǵaly sý aıdynynan 17 adam qutqaryldy
QOSTANAI. QazAqparat - Qostanaı oblysynda shomylý maýsymy bastalǵaly beri sý aıdynynan 17 adam qutqarylǵan, dep habarlaıdy QazAqparat.
Bul jaıynda Qostanaı oblysy tótenshe jaǵdaılar departamenti bastyǵynyń orynbasary, polkovnık Azamat Orymbaev oblystyq «ALAÝ» telearnasynyń onlaın efırinde aıtty.
Spıker Qostanaı oblysy aýmaǵynda shomylý maýsymynyń ótý erekshelikteri, sýdaǵy tótenshe jaǵdaıdyń aldyn alatyn profılaktıka jumysy týraly aıtyp berdi.
Bul - sý aıdyndarynda jergilikti patrýldeý, demalýshylarmen nusqaýlyqtar, jadynamalar men broshıýralar taratý, BAQ arnalǵan baspasóz is-sharalary, «Shomylýǵa tyıym salynady» eskertý anshlagtaryn ornatý, jazǵy demalys kúnderi TJD qyzmetkerleriniń erekshe baqylaýynda balalarmen jumys, balalardy saýyqtyrý jáne mektep janyndaǵy lagerlerge barý.
Qutqarýshylar shomylý maýsymy bastalǵannan beri sý aıdyndarynda 17 adamdy, onyń ishinde 2 jasóspirimdi qutqardy.
Departamenttiń sýda qutqarý stantsııasy bazasynda 74 adam oqytyldy, onyń 49-y jasaq qutqarýshysy anyqtamasyn aldy.
Oblys aýmaǵynda halyqtyń shomylýyna arnalǵan 9 resmı oryn bar. QR Ádilet mınıstrliginde jáne basqa da vedomstvolarda tirkeý rásiminen ótkennen keıin qosymsha taǵy 14 jaǵajaı ashý josparlanyp otyr.
Eger demalýshylar jabdyqtalǵan orynda shomylatyn bolsa, onda sýdaǵy jazataıym oqıǵalar az bolady.
Sodan keıin A. Orymbaev shomylý maýsymynyń qaıǵyly statıstıkasyn atap ótti.
«Tek 23 tamyzda Tobyl ózeninde adamdardyń qaza bolýynyń eki faktisi tirkeldi. Bul - 1958 jáne 1968 jyly týǵan er adamdar. Ekinshi jaǵdaı Rýdnyıda, Frolov kóshesinde shomylýǵa jabdyqtalmaǵan jerde boldy», - deıdi polkovnık.
