Qostanaıda shına qaldyqtary qaıta óńdelip, kádege jaratylady
ASTANA. KAZINFORM — Qostanaı oblysynyń Rýdnyı qalasynda «Edil ı kompanııa» JShS-niń paıdalanylǵan avtomobıl shınalaryn qaıta óńdeý zaýyty iske qosyldy, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
Joba «Jasyl damý» AQ qoldaýymen júzege asyrylyp, elimizdegi ekologııalyq ınfraqurylymdy damytýǵa baǵyttalǵan mańyzdy bastamalardyń biri sanalady.
— Jobanyń jalpy quny 354,5 mln teńgeni quraıdy. Qarjylandyrý kádege jaratý alymy qarajaty esebinen qamtamasyz etildi. Kásiporyn paıdalanylǵan shınalardy qaıta óńdeý arqyly qaldyqtardy tıimdi basqarý júıesin damytýǵa úles qosady, — delingen mınıstrlik habarlamasynda.
Atalǵan joba «Taza Qazaqstan» respýblıkalyq bastamasy aıasynda iske asyrylyp, qorshaǵan ortaǵa túsetin júktemeni azaıtýǵa, qaldyqtardy qaıta óńdeý úlesin arttyrýǵa jáne óńirdegi ekologııalyq jaǵdaıdy jaqsartýǵa múmkindik beredi.
«Jasyl damý» AQ aldaǵy ýaqytta da «jasyl» ekonomıkany damytýǵa, ekologııalyq mádenıetti qalyptastyrýǵa jáne qorshaǵan ortany qorǵaýǵa baǵyttalǵan jobalardy qoldaýdy jalǵastyrady.
Osyǵan deıin avtokólik shınalaryn tańdaǵanda nege mán berý kerek ekenin aıtqan edik.
