Qostanaıda shekarashylardyń mobıldik beketteri turǵyzylady
QOSTANAI. QazAqparat - Qostanaı oblysyna jumys saparymen kelgen QR Parlamenti Májilisiniń depýtattary Gleb Şegelskıı men Quralaı Qareken Denısov aýdanynyń turǵyndarymen kezdesti, dep habarlaıdy QazAqparat tilshisi.
«Nur Otan» partııasy oblystyq fılıalynyń baspasóz qyzmetinen málim etkendeı, halyq qalaýlylary Denısov aýdanynda qoǵamdyq qabyldaý ótkizip, halyqtyń muń-muqtajyn tyńdady. Aıta ketý kerek, qoǵamdyq qabyldaý bólmeleri búginde halyq pen bılikti baılanystyratyn kópirge aınaldy. Burynǵydaı, túrli vedomstvo ókilderin aralaýdyń qajeti joq. Memlekettik organdardyń ókilderi, halyq qalaýlylary men úkimettik emes uıymdardyń ózderi máselemen júgingenderdi tyńdap, qol ushyn berip keledi.
«Qabyldaýǵa kelgender depýtattardan materıaldyq kómek alýǵa qolǵabys etýin surady. Máselen, Denısov aýdanynyń turǵyny Asylbek Erjanov kórshiles Reseı Federatsııasynda ornalasqan «Ilızarov» jeke klınıkasynda em-dom sharalaryn alǵysy keledi. Alaıda, bul kóp qarajatty talap etkendikten arnaıy kvota suraı kelipti. Sol sııaqty, Naǵıma Hasanova da qarjylaı kómek kórsetilse deıdi. Ol Qazaqstannyń sakraldy nysandarynyń tizimine engen, Qamysty aýdanyndaǵy arheologııalyq eskertkishterge zertteý júrgizýdi maqsat etip otyr», - deıdi partııa fılıalynyń baspasóz qyzmetindegiler.
Jumys sapary aıasynda, Májilis depýtattary aýdan aktıvimen kezdesip Sverdlov aýylyn sapaly aýyzsýmen qamtý máselesin talqylady. Aýyl sharýashylyǵy salasynyń negizin quraıtyn ata kásipti órkendetý jaıy sóz boldy. Máselen, «Sybaǵa» baǵdarlamasy aıasynda tórt túlikti syrttan emes, elimizdegi tasymaldaýshy operatorlardan alýdyń tıimdi tustary aıtyldy. Budan bólek, májilismender Sverdlov aýylyndaǵy «Kolos-Fırma» JShS jumysshylarymen kezdesip, Elbasy belgilegen tapsyrmalardyń oryndalý barysy men aldaǵy mindet-maqsattardy aıtyp berdi.
Depýtattar jumys sapary sońynda shekara zastavasynda boldy. Munda aldaǵy ýaqytta shekara qyzmetkerlerine arnalǵan mobıldi beketter turǵyzylýy múmkin. Parlamentshiler jobanyń jaı-japsarymen tanysyp, qoldaý bildirdi.
