Qostanaıda shekarashy ıtterdi nege satyp jatyr
ASTANA. KAZINFORM — Qazaqstandyqtar jelide shekarashylardyń qyzmettik ıtterin elektrondy saýda arqyly satý máselesin qyzý talqylap jatyr. UQK Shekara qyzmetinde 10 jyl boıy el shebin kúzetken ovcharkalar 935 teńgege baǵalanǵan.
Elektrondy saıtta Qostanaı oblysy boıynsha Shekara qyzmeti departamentiniń tiziminde turǵan birneshe nemis, shyǵys eýropalyq jáne belgııalyq ovcharkalar paıda boldy. Satýshy retinde Qorǵanys mınıstrligine qarasty «Qazspetseksport» kásiporny kórsetilgen.
Jeli qoldanýshylarynyń pikiri ekige bólindi. Biri adal serik bolǵan janýarlardyń mundaı tómen baǵaǵa baǵalanǵanyna nalysa, endi biri bul olardy uıyqtatyp tastaǵannan áldeqaıda qaıyrymdy sheshim ekenin aıtyp jatyr.
— Óte ókinishti, senimdi seriktiń jyldar boıǵy qyzmetiniń quny 500-900 teńge bolǵany ma? — dep jazdy oqyrmandardyń biri.
Alaıda, kópshilik buny ıtterge laıyqty «zeınetke» shyǵý múmkindigi dep baǵalaıdy. Olardyń pikirinshe, ıtterdi memlekettik mekeme asyraı almaǵandyqtan, jaqsy adamdardyń qolyna bergeni durys.
Qujattarda ıtterdiń bıyl 10 jasqa tolǵany jáne qyzmetten bosatylýyna fızıkalyq belsendiliktiń tómendeýi jáne sozylmaly aýrýlardyń paıda bolýy sebep dep kórsetilgen.
Kóptegen ıt 935 teńgege baǵalanǵan. Tek «Maıra» esimdi nemis ovcharkasynyń bastapqy quny 2719 teńge dep belgilengen. Alty janýardyń jalpy baǵalanǵan quny 7394 teńge.
Aıta keteıik, elektrondy saýda erteń, 2026 jyldyń 20 aqpanynda saǵat 10:00–de bastalady.
Buǵan deıin, Pavlodarda ıisshil ıtterdiń kómegimen 200-den astam qylmys ashylǵanyn jazǵan edik.