Qostanaıda sharýashylyqtan ıtalııalyq prýs pen shegirtke úıiri anyqtaldy

QOSTANAI. Qostanaı óńiriniń «Zarechnoe» tájirıbelik-óndiristik sharýashylyǵynyń aýmaǵynda ıtalııalyq prýs pen tabyndyq emes shegirtkelerdiń úıiri anyqtaldy. Ol jerge Qostanaı oblystyq aýmaqtyq ınspektsııasynyń jetekshisi Darhan Ábdikárimov bastaǵan mamandar toby bardy, dep habarlaıdy QazAqparat.

Egistikterdi zertteý nátıjesi Qostanaı aýdanynyń azdaǵan aýmaǵynda zııankes taralǵanyn kórsetti. Sondaı-aq jándikterdiń taralý qaýpiniń tómendigine qaramastan, bul aýdanda jáne Qostanaı qalasynda aýmaqtarǵa hımııalyq óńdeý júrgizý týraly sheshim qabyldandy.

Aýyl sharýashylyǵy mınıstrliginiń málimetinshe búginde Qostanaı oblysynda tabyn shegirtke zııankesteriniń bolýyna baılanysty 1,7 mln ga jer zerttelgen. Italııalyq prýsqa qarsy qorǵanys sharalary 290,9 myń ga jerde, azııalyq shegirtkege qarsy 6,5 myń ga jerde júrgizildi. Oblysqa barlyq qajetti preparat aldyn ala jetkizildi.

Jalpy, tabyn shegirtkeleriniń damýy men taralýy tsıkldik sıpatqa ıe. Aýa raıy men klımattyq jaǵdaılarǵa baılanysty ár jyldary zııankester sanynyń kóbeıip, azaıyp otyrady.

Máselen, shegirtkelerdiń eń aýqymdy taralýy 2000 jyly tirkelgen bolatyn: 7,1 mln ga aýmaqqa tarady. 2015 jyldan 2019 jylǵa deıin hımııalyq óńdeý alańynyń 3,2 mln gektardan 567,6 myń gektarǵa deıin tómendeýi baıqaldy.

2020 jyldan bastap qazirgi ýaqytqa deıin tabyn zııankesteri kóp tarala bastaǵan.